張諾 - 非凡家宴｜品味好生活
張諾
2024-02-09 00:00
字體大小
朋友是高級管理人才，經常赴海外公幹，搭飛機多過坐巴士，在商界長袖善舞，有空回到豪宅家中，華麗變身，幾道撚手小菜，勁過米芝連大廚。有幸成座上客的人，無不大讚味道一流。
好友着她多留香港，為大家舉辦一次「美女廚房」。等了又等，她終於為我們這班為食鬼，犧牲一下事業，一次過煮了以下盛宴：「前菜：醉鮑魚、鮮百合芹菜和陳醋木耳；主菜：梅菜鴨、原隻海蝦煎餃子、南乳齋、酸菜肉丸、蜜汁火腿、胡椒蟹煲、薑蔥蒜子雞、生死魚戀飯；甜品：焗酥皮年糕。」
見有她和一名菲傭在廚房內轉幾圈，就搞掂以上菜餚，神乎奇技，每一碟都好味到冇朋友，尤其是胡椒蟹煲和生死魚戀飯，前者用四隻大海蟹切件，放入胡椒豬肚湯中滾一滾，香氣四溢，蟹肉滲入胡椒湯味，胡椒湯中有蟹汁，極之和味。
問美女大廚如何炮製如此盛宴，她透露其「秘笈」︰「來料加工」，以胡椒蟹煲為例，她先到一間以胡椒豬肚湯出名的店子買外賣，回來加入海蟹煲滾即成。另一款薑蔥蒜子雞，先去買靚豉油雞回來，放入有大量蒜子的瓦煲加熱即成，輕而易舉。
認真叻叻，把外賣美食加添食材，就成就天花板美饌！吃着由原條黃魚焗的油飯，魚味鮮甜，飯粒飽滿，飯焦香脆，這一餐，很幸福。
張諾
更多文章
