洪禮賢 - 行街莫做低頭族｜Chok王心得

更新時間：00:00 2022-03-14 HKT
發佈時間：00:00 2022-03-14 HKT

馬不停蹄，禮拜三又有九場谷草賽事，原本想寫馬，但因近日太多負面新聞，真的有感而發。CHOK王唔係想講國家大事，而係想講大家唔好喺街做低頭族，一定要一眼關七、耳聽八方。若果唔做好一個眉精眼企嘅路人，隨時飛來橫禍！試問邊有人會諗到，坐喺PP竟然生命受到威脅，畀人打到危殆！

另外，這是個人親身經歷，有必要分享，並以此為鑑！雖然我有六呎高，一樣會被賊人盯上！事緣喺某夜，自己一個行緊條長樓梯，該樓梯有兩邊Lane，當時我在左邊Lane下行，迎面有個人喺隔籬Lane往上行，基於個人習慣，我不時會回頭望，當時我見到那人轉到我那邊線（其實佢可以喺右邊線下行），亦步亦趨跟隨我，那一刻我決定停一停，結果該黑衣人也停步，並即刻企定扮玩手機，那一刻我見勢色唔對，於是立刻拔足狂奔，走出光猛大街，而我見唔到那黑衣人繼續向下行，肯定有景轟啦！我想，若果自己無回望，令該黑衣人打個突，可能佢已幾步埋我身，到時開大開細好難講！所以，喺街行，尤其夜麻麻，千祈要打醒十二分精神，久唔久回頭望，絕對唔會有錯。
洪禮賢