關志康 - 為何時間過得越來越快？ | 神耆商機
關志康
5小時前
字體大小
飲茶時，一位老闆拿出公司年曆卡分派給大家：「今年過得特別快，一眨眼就2026年啦！記得小學時，總覺得日子漫長，暑假百無聊賴，看似永無盡頭。𠵱家呢？眨下眼就一年，哈哈，轉眼就一世啦。」剛從洗手間回來的老友聽到，馬上接話：「就好似卷廁紙咁，頭幾段用得好慢，點用都唔覺少；捲到尾段，兩下就沒了。」
事實上，「隨年齡增長而感覺時間加速流逝」 是普遍的現象，心理學同神經科學均有着實探討。研究指出，隨着年紀增長，生活多樣性減少，記憶中的新鮮感隨之減少，因而令人感覺生活變得單調，回憶過去的時候便覺得時間過得特別快。換言之，當日常生活越來越固定、例行公事越多、腦袋裏面新鮮記憶越少，回顧時自然感覺時間「被壓縮」。
此外，認知同神經生理上的轉變亦有影響，其中大腦神經訊號處理速度會隨年齡下降，令年長者覺得「幀率」減低（即腦袋接收訊息嘅頻率變慢）。情況有如看動畫書，當圖片逐漸減少，翻閱的時候就感覺時間飛快。
席間，旅遊達人先行告辭：「時間過得特別快，又係時候講拜拜！我趕住去機場，你們多去旅行，時間會過得慢啲，去一個周末都好似過了一個星期！」其實有研究證實，學習新技能、探索新地方、接觸新興趣等，都能為大腦帶來豐富的新資訊同新記憶，使人回憶時有更細緻的時間標記，主觀時間感自然會拉長。
見大家七嘴八舌，沖茶的「伙記仔」也按捺不住搭嘴：「我就覺得時間過得好慢啦，等極都未放工！『籠中鳥』會唔會覺得眨吓眼就坐咗幾年呢？各位老闆，快樂才會『不知時日過』！時間過得快，證明大家日子過得好，生活愉快，身體健康！」
健康教育基金會主席
關志康
