有片｜不滿被「呠」起爭執 大圍圍方保安喝罵鐵騎士「躝啦」 網民：好大官威
發佈時間：13:16 2023-11-05
大圍圍方商場發生保安員喝罵電單車司機「躝屍」事件。網上流傳兩段短片，顯示事發於昨日（4日）早上10時許，一輛電單車駛入圍方停車場時，在場一名身穿反光衣的職員行在行車路中心擋路，鐵騎士於是響咹「呠、呠」示意對方讓路，未料職員不滿被「呠」，與鐵騎士發生爭執。其後數名保安員到場，其中有保安更喝罵鐵騎士「躝啦」！事件惹來網民熱議，批評「啲保安咁惡嘅」、「好大官威」，又指「以後都唔敢去呢個商場囉」。
首條影片全長約28秒，片中所見電單車駛入大圍圍方停車場，其間鐵騎士向行在行車路上的職員響咹，職員回過頭來看見是電單車擬駛入車場，隨即上前反問鐵騎士：「你呠我呀？你有嘢搵我呀，呠我做咩？」鐵騎士於是答道：「你行馬路中心，我唔『呠』你呀？」惟職員不滿，稱：「我喺度做嘢，你『呠』邊個呀？」、「你泊出面啦，你咁鐘意泊」，又斥責：「你『呠』邊個先？你係咪撞我呀？」
另一段影片長約2分鐘，所見數名保安員到場調停事件，有保安員替涉事職員打圓場說：「我哋呢位師兄喺呢度出入。」惟鐵騎士反駁稱職員應該行行人路，又斥責：「人路就行人路，狗路就行狗路，啱唔啱呀？」在旁一名戴眼鏡的保安介入，詢問鐵騎士到場所為何事：「你講一次，而家你做咩事？」鐵騎士說明自己是到場提取物件，又解釋響咹原因，「我撞到你（職員）就無謂，啱唔啱呀？『呠』人呢就提醒個人啫，係咪呀．．．又話佢喺呢度做嘢，周圍行都得嘅。」
該名戴眼鏡保安員聽罷，即時替同事辯解，指他在場工作「呢個事實呀」，反問鐵騎士：「咁我同事有對你做啲咩？」、「咁你而家想點先？」雙方爭拗未有平息，該名保安顯得不耐煩，厲聲問鐵騎士：「我而家問你，你係咪想報警？我問你一樣嘢，你係咪報警先，報啦！」但鐵騎士卻稱：「我報咩警啫，我去攞嘢之嘛。」戴眼鏡保安員隨即發火：「唔係同我躝啦，唔係同我躝啦，咁你喺度做咩，搞事呀！」
鐵騎士不甘示弱反駁：「躝乜嘢啫，躝乜嘢呀？」戴眼鏡保安員再三說「躝啦」、「你報（警）啦」，其間他見鐵騎士向其心口名牌拍攝，即指向自己名牌聲稱「隨便，隨便」，又稱：「你（鐵騎士）而家阻住喇，你係咪報警，躝啦，你報啦！」鐵騎士又反問：「咩叫做躝呀？」戴眼鏡保安員則說：「躝即係爬行囉，咁咪行囉，唔識躝咪爬囉」，又厲聲喝道：「你搞事，我就搞事而家！」片段至此亦結束。
港鐵公司回覆《星島頭條》查詢表示，港鐵商場一向對於前線員工的工作及服務水平有既定的要求。就查詢的事宜，港鐵會了解事件及作出適切跟進，同時亦會提醒前線員工遵從工作守則，並加強相關培訓。
---
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
