CHILL CLUB頒獎禮2023丨RubberBand出聲明向姜濤道歉 深明尊重不同聲音的重要性
發佈時間：21:49 2023-05-10
RubberBand成員之一的泥鯭昨日就姜濤在《CHILL CLUB推介榜 年度推介22/23》領「年度男歌手獎」銀獎時，用了近6分鐘向11位隊友致謝兼「示愛」，連環出post狂嘲︰「多謝說話定係『鼓勵』說話？！WTX？！係咪short X咗？！修哥都講唔出啦」，結果引起兩邊fans展開罵戰！今日在RubberBand的官方社交平台上公開道歉：「今次事件確實得到一場反思，在仍然堅信社會應要存在自由的言論空間的同時，我們亦深明表達手法、尊重不同聲音的重要性。」
【其他閱讀】：Chill Club頒獎禮2023丨姜濤屈居男歌手銀獎向11鏡仔逐個「表白」 認跟AL多誤會跟一成員冇偈傾
【點擊睇RubberBand道歉全文】：
在帖文中，RubberBand以黑底白字的圖片留言：「對於隊友近日失言而引起的風波，我們感到非常抱歉。經過隊友間反覆討論，今次事件確實得到一場反思，在仍然堅信社會應要存在自由的言論空間的同時，我們亦深明表達手法、尊重不同聲音的重要性。對於是次事件引起之擾攘爭持，還有浪費了公共媒體資源，我們希望藉此向各受牽連單位及人士致歉！」
事件亦引起網民留言，有人說：「我鍾意RB，亦鍾意姜濤，點解？大家都忠於自己，大家亦願意承擔責任！香港跟其他地方有別，香港人受的高等教育讓大家有分析判斷力，大概容得下一句忠於自己發表的意見吧！這是香港人可愛及珍貴之處。RB加油！泥鯭加油！姜濤加油！」、「欣賞你哋出post表達想法，勇於面對輿論兼無冷處理已經唔容易，繼續支持RB#言論自由最重要係互相尊重」
今次事緣是RubberBand獲「年度樂隊」銀獎後，主音6號拍片道謝並稱多做音樂少做無謂嘢，泥鯭在FaceBook出po撐隊友兼「有骨」留言：「唱好啲歌先做啲小動作啦，＃全晚最啱聽嘅評語」，後來他更借勢連環出「地球(公開)PO」：「多謝說話定係『鼓勵』說話？！WTX？！係咪short X咗？！修哥都講唔出啦」、「攞終身成就獎嘅精神健康狀態」、「歌迷會夾份請個writer同看護俾佢啦要」。愈講愈興起的泥鯭到了頒獎禮接近尾聲時，再轉移焦點炮轟ViuTV並寫道：「嘩DLLM 頒唔尷尬，攞唔尷尬，唯有睇嘅尷尬」、「又一個大台的誕生」、「依家諗返當年亞太區最受歡迎男歌手真係『實至名歸』」、「下屆叱咜司儀會點玩呢段感言？」似是暗串ViuTV把三個男歌手獎全部給MIRROR成員，擺明偏幫自己友。
由於泥鯭的帖文是公開，於是留言一出，隨即惹起兩派粉絲罵戰，有網民洗版為MIRROR護航：「身為前輩講呢啲，抵你無運行」、「你哋以為自己喺樂壇大哥？無品！」、「雖然你哋一把年紀，不過仲有時間努力嘅，唔好再妒忌人啦」。甚至還有人仲牽扯到黃心穎身上：「留言同揀女人一樣無腦，要黃心穎」、「細路仔都恰上台講幾句嘢都得罪你？」不過亦有唔少人撐泥鯭反駁：「真係為你偶像好就叫佢正視佢問題，唔係盲撐他只是個孩子」、「唔啱睇就過主，做乜要去人哋FB度吠？」泥鯭就無懼負評，翌日更上載涉批評姜濤留言的截圖，並附上藍白封條，上面更打上「鏡安公署」並表示：「與有榮焉」。
【其他文章】：
鄭希怡8歲囡囡梁浸浸家中飛簷走壁 上海豪宅樓底極高巨型花園仲有魚池假山
57歲曾華倩素顏現身P圖過龍變臉 遭嘲諷「認唔到」連湯鎮業都變V面
肥媽李鼎丨鼎爺為生命中最重要的女人淚灑人前 肥媽同仔女講定遺產去向
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
