星8卦丨「阿寶」有大水喉射住 鍾意袋現金周圍派

更新時間:10:00 2023-03-17
發佈時間:10:00 2023-03-17

「阿寶」性格好敦厚,除咗對自己嘅愛人比較任性,佢對身邊幫自己嘅人一向好闊綽。「阿寶」出道以嚟,桃花旺盛,先有「叔叔」提出照顧,最抵死係「叔叔」為咗可以同「阿寶」海誓山盟,竟然同老婆離婚,然後打本過億俾「阿寶」做生意。

不過「阿寶」有童年陰影,所以乜嘢交易都係用現金,「叔叔」惟有全部配合,可惜投資失利,「阿寶」藝術家脾氣令「叔叔」成日同佢嘈交,久而久之感情有變。

呢個時候「獨仔」乘虛而入,原來早在「阿寶」出道已經生滋貓入眼,可惜當時「靚仔」同佢愛得痴纏,「獨仔」無法埋手。「獨仔」屋企係富豪榜有排名,所以「阿寶」出手愈來愈疏爽,由嗰陣開始,日日出街袋住十零廿萬,啱啱過年派利是,「阿寶」好豪咁人人派金牛,幫得手嘅直情收6位數紅包,最重要係乜呀,全部現金,有時收嘅人都諗佢點樣搬咁多現金返屋企?呢啲梗係背後大水喉「獨仔」安排成間公司嘅人幫忙操作。

就算閒時開工,「阿寶」都好鍾意封利是,收工夜咗,所有茶水梳化工作人員,佢都俾的士錢,有時某某生日,佢又會封生日利是,總之人人有份,佢又唔會大細超。

跟咗佢多年嘅助手,出街幾乎唔駛帶現金,因為老細大把,但你一定要幫佢預備廿零三十個靚靚利是封,方便「阿寶」隨時可以用嚟封現金。

除咗鍾意派利是,「阿寶」亦好體恤幫自己嘅工作人員,平時40蚊一個飯盒,只要同佢開工,就可以食成百蚊嘅,唔夠佢就一定包底,絕對唔孤寒。因為呢份真心,所以佢近年做乜都好順利,人緣亦愈來愈好。
 

 

【相關文章】:

星8卦丨「細眼」搶阿姐工作捱鬧犯眾憎被迫收皮

星8卦|「威哥」充闊佬個個月送老婆限量包包  自己慳家特賣場執平貨

星8卦|「大眼」搞散老闆頭家 得罪正室被雪藏 結果要搵老襯埋單

《星島申訴王》於3月1日隆重登場,節目為民請命抱不平、追蹤城中熱話,亦會搜羅溫情小故事。你申訴,我跟進,搵91999933,《星島申訴王》隨時候命!
立即報料:https://bit.ly/3IMunqd
你的獨家報料一旦被採用及報導,將獲得乙份獎品。

《星島頭條》APP經已推出最新版本,請立即更新,瀏覽更精彩內容:https://bit.ly/3yLrgYZ