港人情侶$19,888影婚紗相中伏？準新娘怒數10宗罪 質疑店方非法出租XX 陽光普照影到似「陰間」+花田變荒地

結婚是人生大事，一對新人當然想留下美好回憶，不過最近有港人情侶花$19,888拍攝婚紗相，卻換來一連串不愉快經歷，準新娘日前發文怒轟婚紗攝影公司，貼出「炒車相」再怒數10宗罪，如陽光普照影到似「陰間」、花田變荒地、驚現走光相，大呻「成件事簡直係一場災難！」店方更被質疑非法出租車輛？

港人情侶$19,888影婚紗相中伏？準新娘怒數10宗罪

最近有準新娘於Threads上發文，分享日前拍攝婚紗相時遇到的不快經歷，她指籌備婚禮時於婚紗展被一間婚紗攝影公司的攤位吸引，因展示的模特照片質素不俗、價格相宜，遂以$16,888預訂濟州島婚紗照套餐，另加$3,000拍攝香港外景，總額$19,888，然而，服務卻讓他們大失所望，「成件事簡直係一場災難！」

罪狀1：陽光普照變「陰間濾鏡」

在今年3月，準新人在香港拍攝首輯婚紗相，選址包括石澳、赤柱、舂坎角及飛鵝山，當天天氣晴朗，理應是拍攝婚紗照的絕佳條件。然而，收到的照片色調卻異常昏暗，事主形容「好似加咗個陰間Filter咁」，她提出調校光亮度的要求，卻被公司告知需額外支付$4,000，無奈照單全收。

罪狀2：「開罐頭式」拍攝 準新娘呻老土

拍攝過程中，攝影師只顧指示新人擺出千篇一律的姿勢，事主形容為「開罐頭式」拍攝，毫無個人特色，最終照片效果「超老土尷尬」，成品令事主相當不滿意。

罪狀3：涉嫌非法出租車

拍攝香港外景時，事主原計劃自行駕車，但婚攝公司建議支付額外$2,000租用其「有許可證」的車輛，事主為方便起見答應，事後查詢運輸署時卻發現該車輛並無出租車許可證，質疑店方涉嫌非法出租車輛。

罪狀4：濟州花海變荒地？

經歷香港外景的「慘劇」後，事主對濟州島拍攝寄予厚望，提前一個月準備參考圖片及行程，向店方提出希望拍攝花海景致。然而，攝影師未有實地考察，僅憑「花已開始凋謝」為由，擅自更改行程，最終到達攝影師推介的蕎麥花田拍攝時，卻驚現大片荒地，背景雜亂無章，事主直言：「完全睇唔出嗰度係濟州嚟，唔講以為係錦田鄉村俱樂部！」

罪狀5：構圖古怪

一行人之後到達第二個拍攝地點拍攝小雛菊花海，事主在收到成品才驚覺構圖十分古怪，照片構圖角度歪斜，部分照片甚至將路人及巴士拍入背景，破壞畫面美感，事主貼出成品照片，形容：「有啲影到我地成個路人甲乙丙咁，又叫我哋擺啲pose企到勁遠兩個好似唔識咁……」

罪狀6：背景失色

後來事主到濟州彩虹公路拍攝，該地點本應以藍天、大海及彩虹石為亮點，事主亦強調當天陽光燦爛，理應可拍到藍天和大海，怎料成品照片的天空與海面卻白茫茫一片，令事主相當失望。

罪狀7：走光問題未獲重視

更令人氣憤的是，事主多次在拍攝時提醒化妝師及攝影師注意裙子走光的問題，攝影師卻回應「不會拍到」。然而，成品照片中多張出現走光情況，她表示「我相信呢樣嘢冇一個女仔會接受到」，尤其這些照片原計劃在婚禮展示，現卻無法使用。

罪狀8：攝影師拒絕即時預覽照片

拍攝期間，事主多次要求查看即時照片以確認效果，但攝影師僅展示一至兩張照片，敷衍了事，導致事主在收到成品才發現問題，卻為時已晚：「我哋仲有唔夠半年就big day所以都唔夠時間再去濟州影多次。」

罪狀9：服務欠專業

當事主在準備濟州拍攝行程時，在網上見到有新人拍攝手持一束氣球，便向公司查詢道具的購買地點，怎料對方竟建議她自行聯繫拍攝者查詢。令事主相當無奈，指兩人從未到過濟州，對當地不熟悉，表示店方服務欠專業：「冇諗過一間十幾年公司嘅婚攝公司嘅建議會係咁。」

罪狀10：投訴後公司推卸責任

收到照片後，事主向婚攝公司反映問題，指出成品與預期嚴重不符，但公司僅表示會「盡力修圖」，實際上對構圖及角度等問題束手無策，同時公司以「已提供服務」為由，拒絕退款。事主直斥不負責任：「如果我點了牛扒，卻收到『牛屎』，這也叫提供服務？」又稱「本來結婚係一件開心嘅事，我亦明白服務係提供咗嘅，但我哋都有俾錢，而出嚟效果強差人意，同本來係婚展睇到嘅相係完全唔係同一回事！」

事主最後補充：「呢段咁悲慘嘅回憶就算退款俾我哋亦都補償唔到我哋嘅損失，因為中間我哋都花咗時間心機去準備，更加唔會預計影出嚟嘅效果係差到要重新再搵攝影公司影過。」希望透過這段不快經歷，力勸其他準新人「避伏」。

網民斥無誠意：搏等你加錢買佢啲「精修」版！

對事主的經歷，不少網民大感同情：「錢你就識袋，專業就完全見唔到。」、「依輯相等於業餘，分明直出無執相啦，改色溫亮部光暗有幾難呀？」、「至於藍天都變『黑尋尋』，我思疑係特登校到咁，等你加錢買佢啲『精修』版，因為呢筆先係大茶飯！」、「好慘呀，成兩皮野影到毫無美感又老土！你再花少少錢再影過啦」、「衰過iPhone影」、「止蝕離場啦，執相錢都唔洗比佢」、「完全冇誠意」

亦有網民表示同樣「中過伏」：「我都有係呢間影都係超級暗，不過我係揀左係室內影，全部相好似無開燈咁……」、「我都係呢間呀！佢地唔識影相+唔識執相，仲可以收你$200一張精修，而執出來都係垃圾咁！改左起碼5次都執唔到你想要嘅色！最後我已經放棄，反正佢地啲相執咩色都唔會係靚，同ig嘅係兩回事！」、「好心佢無技術去進修下啦，害人不淺！」

資料及圖片來源：Threads

延伸閱讀：港女質疑荃灣食店「冇廁所」講大話！嬲爆即取消全單：香港餐廳執笠自己攞嚟 惟1原因惹網民熱議