東張西望丨「燒香男」為空氣清新劑與鄰居少女對質 各執一詞不歡而散爆seed做呢件事
發佈時間：22:00 2025-08-15 HKT
今晚（15日）TVB《東張西望》播出一宗鄰里糾紛，弱質女流Joyce因燒香問題向鄰居作出投訴，結果被 「燒香男」不分晝夜責罵，令她的精神大受困擾。
「燒香男」在Joyce的門口不停叫囂
在閉路電視的影片所見，看到身形高大的「燒香男」在Joyce的門口不停叫囂，狂鬧：「廢物，唔好停手呀，停手就死全家！」、「扮唔喺度？扮可憐。見你一次X你一次。」
相關閱讀：東張西望丨元朗13歲男童涉非禮7歲女童 受害人重組被侵犯經過：係咁摸我屁股，抱我去角落
事件令Joyce擔驚受怕情緒大受困擾
事件令Joyce擔驚受怕，只要「燒香男」一出口嚇到「騰騰震」情緒大受困擾。對於事件的起因，原來與噴空氣清新劑有關，「燒香男」隔着鐵閘接受《東張西望》訪問，談及事發經過：「上年端午節嘅前一晚，我唔知點解樓上、樓下各裝多咗３、４支香，裝完之後咪入返屋，跟住聞到一啲空氣清新劑嘅味，跟住我咪拍佢門，因為我搵唔到佢屋企個門鐘，佢隔離有乜家庭成員呢？我知係有兩個女仔同一個阿媽。」「燒香男」續說：「嗰個阿媽第一句就問我『信乜嘢神？你唔裝香畀埋自己？』我咪話『我裝埋畀你呀』，再同佢阿媽講『對唔住，我每日上三枝香，每次一支、早估午晚』，跟住佢阿媽同我講『好呀，唔該晒』之後就閂門。點知過咗一日就照噴，係空氣清新劑嘅味道，到而家都係。中間鬧佢噴嘢噴得好勁，連lift口都聞，嗰種濃嘅味道係好誇張。」
「燒香男」堅稱煙味問題已經大大改善
「燒香男」堅稱煙味問題已經大大改善「我已經去咗太子花園街啲香燭店買啲短香，係冇乜味，但係佢（Joyce）仲不斷投訴，搵消防、警察，因為佢扮受害者，佢係女仔我係男人，以為自己業主大晒，跟住業主同我講，話佢推翻晒所有嘢，話自己冇講，佢激嬲咗個業主之後，我就畀每日裝三次香，每次三支。我哋啲嘢本來係傾好咗，我同佢阿媽傾好，佢仲係繼續噴，第二次我業主同佢傾好，佢又當冇講過，全部推翻晒，即係擺明有心搞嘢，佢傻架，你去訪問吓佢，點解講完啲嘢唔算數。」
相關閱讀：東張西望丨六旬失婚婦遭「靚仔」威脅綁架逼上床：我已經冇晒呢種知覺 被問拎裸照強硬拒愛
Joyce即場與「燒香男」對質
Joyce即場與「燒香男」對質：「當初噴空氣清新劑都係因為啲香味太勁，（點解同業主推翻）你攞啲證據出嚟。（你同巢小姐，你去問佢喇，你話你有佢電話）我完全冇囉，（你喺度扮傻扮慘）你一路屈我，（我業主話send畀我，我唔要，因為私隱問題，你問佢喇）」接着「燒香男」一輪咀指責Jocye，Jocye忍不住說：「你喺邊度同我阿媽傾過？（門口）我阿媽從來都冇上過嚟，從來都冇母親存在過（你講大話，到而家都仲要講大話，我講大話腸穿肚爛）。」Joyce堅稱當時只有她自己一人：「其實你講嗰個根本就係我嚟，但係你自己覺得係同我阿媽講嘢，除咗第一次用咗空氣清新劑之外，之後係從來都冇噴過。噴嘢係一個動作，你有冇證據呀？」
「燒香男」突然爆seed稱而家搬走
Jocye稱每一日都忍受裝香的氣味，經過你一言我一語後，「燒香男」突然爆seed：「我知道，我有同你講過對唔住，我而家搬走，怕咗佢，係我自己話要搬，我都搬走喇，你而家仲要搞埋《東張西望》，我更加唔鍾意佢喇。」不過原來調停事件的巢小姐，突然企在「燒香男」一方，反指Jocye才是始作俑者：「佢係神神化化，誓不罷休就要搵你麻煩，我唔知佢係咪有睇精神科，呢件事係令佢好激動，開頭以為佢好講道理，點知佢應承咗你啲嘢，係會推倒從來，好小事之嘛，一個裝香就嚟啲嘢噴過嚟，再用啲小動物邪住人哋，何必呢，我都有租客講叫佢裝閉路電視，佢唔上肯，佢傻架嘛，我仲理佢咩。我冇見佢嘅媽咪，亦都唔智知邊個係。」最後Jocye無助地痛哭：「我覺得佢大話連篇，講嘅嘢全部冇證據，我第一次噴完已經揼咗空氣清新劑，佢話搬梗係心情輕鬆咗，我希望佢搬走之前唔好再有其他嘢發生。」
