深水埗麥當勞恐怖毆鬥 藍衫漢狂轟六拳三度飛膝專打頭 傷者面腫牙甩送院｜有片
發佈時間：21:48 2025-07-02 HKT
深水埗福華街麥當勞今日（7月2日）晚上約7時發生激烈毆鬥。當時一名藍衫男子在餐廳大門，將身穿格仔衫的男子逼至牆角，至少狂轟六拳直擊面門，更「殺紅眼」三次飛膝猛撞對方頭部，片段流傳後引起網民嘩然，憂慮「搞出人命」。目前警方正調查案件，並追緝涉案人士，傷者則面腫牙甩，送院治理。事後記者重返現場，有目擊市民憶述驚險一刻。
藍衫漢「殺紅眼」 掄拳飛膝下下打頭
網上片段所見，兩人於麥當勞大門位置扭鬥，買餸車等雜物散落一地。其中藍衫漢在毆鬥中幾乎單方面碾壓，將身穿格仔衫男逼往牆角。藍衫漢得勢不饒人，無視旁人叫「唔好打」，一輪拳如雨下，至少6拳擊中格仔衫男面門，令格仔衫男不支倒地，只能雙手抱頭。不過，藍衫漢再可謂「殺紅眼」，竟連續3次飛膝直撞對方頭部，之後才罷手。
目擊市民憶述經過 曾勸遇襲者留低：返到屋企分分鐘死咗
記者事後到事發麥當勞了解，目擊市民雄哥講述事發經過，表示雙方均為中年男子，整場打鬥首先是格仔衫男發難，「瞓低喺地下，箍住佢，再之後唔知點解（藍衫漢）有能力翻返起身，再打返嗰個受傷嘅人，（格仔衫男）逼到去玻璃門 ，唔識還手」。
雄哥續指，格仔衫男被對方「當沙包咁打」，藍衫漢得手後揚長而去。事後格仔衫男「暈陀陀」，重創口鼻流血，他見狀隨即叫格仔衫男不要自行離開，「我叫個男人唔好走，分分鐘被人打到內傷，返到屋企分分鐘死咗都未定，去醫院驗下傷好過啦」。警員其後到場調查，他聽到格仔衫男向警員報稱因「膊頭撞到」、「眼超超」而起爭執，繼而動武。
警方列作「襲擊致造成身體傷害」跟進
片段流傳後引起網民討論，紛紛直斥藍衫漢出手狠辣，猶如泰拳或MMA格鬥技打人，「打多幾吓真係會死人」、「3下膝撞分分鐘收得皮」、「下下膝撞頭部，隨時搞出人命坐一世監」。
警方表示，今日（7月2日）晚上7時許接報，指上址有數人毆鬥，警員趕至時只發現受傷男子，其他涉案人士已不知所終。目前案件列作「襲擊致造成身體傷害」，正追緝涉案人士。受傷男子面腫甩牙，送院治理。
