港闻

娱乐

最Hit

即时

中国

国际

星岛申诉王

财经

地产

生活

健康

教育

体育

专栏

马经

【头条独家】结婚7年痴汉Feel甜望老婆食雪糕直击陈豪陈茵媺初恋式拍拖

即时娱乐

更新时间：22:42 2020-07-02 HKT
发布时间：23:30 2020-07-01 HKT

陈豪搭住Aimee膊头，不时望住老婆食雪糕，其间女方发现记者捕捉其食相时即疯狂爆笑。

49岁的陈豪（阿Mo）啱啱拍完《陀枪师姐2020》，之后又紧接连开两套剧，出名「爱妻号」嘅佢趁放假当然要陪吓一直尽心尽力为屋企嘅老婆。上周一（22日），难得仔女复课，双眼冇乜神的阿Mo拖住老婆陈茵媺（Aimee）去中环拍拖，虽然结婚7年又有三个小朋友，但两人仍似热恋情侣一样，Sweet爆拖手又搭膊头，沿途阿Mo不时喺Aimee耳边俏俏话𠱁对方开心，仲不停如痴汉般甜望老婆食雪糕，完全初恋Feel拍拖，得意又好笑。采访：张咏森

在商讨下一个目的地时，阿Mo全程拖实老婆只手，又帮手拎手袋。

结婚7年的阿Mo和Aimee一直是圈中公认的「模范夫妻」。

陈豪近排好忙，上周才拍毕《陀枪师姐2020》，转头又要为本周一首播的新剧《杀手》密密做宣传，接住再开拍邵氏剧集《飞虎3之壮志英雄》，不过就算剧接剧，永远家庭第一的阿Mo几攰都会「唧」时间陪老婆仔女，好似刚过去的父亲节，他便于开工前同一家人去公园放电，非常温馨。难得小朋友返晒学，上周一两公婆就去中环IFC拍拖，享受二人世界！

陪食陪买
当日下午4时许，记者发现戴上口罩、穿便服的陈氏夫妇企喺电梯口吹水，Aimee孭住大袋Gucci战利品，估计已经同老公Shopping完，而其橙色Hermes手袋就按「惯例」由阿Mo拎住。未知是否意犹未尽唔舍得返归，两人讨论完一轮后，又手拖手上咗3楼买Frozen Yogurt食，以为一杯雪糕两份分，原来是Aimee独食，可能知道老婆钟意食甜品，所以阿Mo让对方一个人享受，自己就喺侧边望住Aimee慢慢嗒，看他双眼笑瞇瞇，浓浓痴汉Feel咁睇住老婆食都咁开心。

孭住大袋Gucci战利品的Aimee，最后上楼买埋乳酪雪糕先走。

见Aimee捧住杯雪糕笑晒，阿Mo都好开心。

调皮茵媺
而暂时卸下「妈妈」身分的Aimee，在老公面前亦显得特别调皮，当发现记者在场时，她即拧转面「偷食」并笑谓：「唔畀你影我食雪糕个样。」记者即识做行开，阿Mo就Sweet爆搭实老婆膊头，双双行去停车场攞车；后来不知是否老公提水？离远见到镜头捕捉她的为食样时，Aimee就再次戴番口罩，又忍唔住「岳」高头大笑，夸张得连途人都忍唔住回头望。两公婆全程都大方任影，临走前仲同记者挥手道别，近距离见到阿Mo双眼现红筋，问他是否好攰？他说：「呢排开工呀，好长时间，每日瞓得几个钟咋。」唔够瞓都牺牲睡眠时间陪老婆行街，呢啲老公真抵锡！