KellyChu - 187件清宫瑰宝穿越四季御猫文创系列抢攻钱包港故宫馆新展览「清宫四时」登场 | Executive日记

更新时间：02:00 2026-11-04 HKT
发布时间：02:00 2026-11-04 HKT

香港故宫文化博物馆又有新搞作喇！佢哋今次联同故宫博物院推出全新大展「清宫四时－－宫廷生活与文化」，带大家跟住清代皇帝度过一年四季。展期由今日起一路去到2028年11月3日，带嚟187件北京故宫嘅瑰宝，展期咁长，想几时睇就几时睇！但全新宫廷御猫文创系列就应该会好抢手喇，猫奴们记得把握机会购买。

　　今次展览以清代宫廷嘅春夏秋冬做主轴，每3个月仲会轮换部分展品。Kelly入场即见重点文物「浑天仪」，原来清廷睇重天文科学，每年都会喺午门举行颁发历书典礼，而浑天仪就象征住「君权神授」。

　　四季各有亮点。春季必睇《胤禛耕织图》，雍正皇帝化身农夫落田耕种。夏季除咗睇皇帝点样避暑同边疆民族外交，亦唔好错过欣赏「转鸭荷花缸钟」，呢件文物结合咗中国珐瑯工艺同法国音乐机关，启动时伴随音乐，三朵荷花慢慢绽放，入面嘅童子同仙猿仲会向西王母跪拜献桃，个表盘仍然可以运作㗎！

　　秋季就要跟住皇帝去「木兰秋狝」，见识下皇家狩猎嘅浩大场面。而冬季一幅3米高、3.6米长嘅超巨型「岁朝图座屏」是为国家一级文物，展现浓厚嘅贺岁气氛。

　　讲到最令Kelly兴奋嘅部分，上次埃及展啲猫猫产品带起热潮，今次故宫推出全新文创系列「宫廷御猫：四时珍宝录」，四大全新角色「天子猫咪」、「妃子猫咪」、「将军猫咪」同「黑猫探险家」萌爆登场，即刻冧爆Kelly！啲猫猫主子仲会穿越入《胤禛耕织图》，又会化身成丝巾、拖鞋、环保袋挂饰等一系列又得意又实用嘅周边，大家都可以拣返样心头好！

KellyChu