【母亲节】燕窝雪白反而唔靓？除咗养颜仲有咩功效？
今日乜都唔讲住，讲咗呢句先：谨祝天下母亲，母亲节快乐。
系呀！今日系母亲节，母亲生你育你，你有乜嘢回馈俾佢？咩话？我会乖？我会听话？呢啲唔够实在㖞，阿妈棉干絮湿咁凑大你，身心灵都需要滋养一下，不如请佢食燕窝啦。燕窝含有丰富钙、磷、铁、钠、钾等微量元素，又有胺基酸、碳水化合物、水溶性蛋白质同丰富燕窝酸，有养阴润燥、益气补中功能，除妈食咗肌肤水润有光泽，精神饱满，中气十足，成个人都靓晒啦。
食咗燕窝不单润肤美肌，仲可以补中益气，讲嘢都大声啲。
燕窝点先算系靓?
咁点为之一只靓嘅燕窝先，首先睇形状，愈似船形或匙羹形最靓。跟住睇颜色，要色泽天然，白燕窝要有少少象牙色，千祈唔好过份雪白，因为咁样可能被漂过，不单唔天然，仲会降低功效。黄燕窝则应该略带微微米色或金黄色，至于血燕，千祈唔好拣鲜红色，真正血燕应该是橙红或灰红色，愈鲜红色的，极有可能系染色或熏制过，都唔系天然健康，功效亦成疑问。但无论边种燕窝，愈干爽愈好，如果拎上手感觉黐手同软绵绵，就系水份多，好易发霉。拣嘅时候，亦可以用鼻闻，闻落有燕子口水味同少少腥味系正常，燕丝要幼而细密，浸发后变得愈大愈好，炖好之后有淡淡蛋白香味就系佳品。
民间流传血燕系由燕子吐血筑成，但呢个说法并无科学根据。
又关郑和下西洋事？
咁正嘅燕窝，中国人最钟意用嚟滋补，但原来中国人识食啫，原产地并唔系中国。燕窝其实来自东南亚，系金丝燕用口水制成嘅育儿巢，通常建构喺海边峭壁山洞中。预备生产嘅金丝燕妈妈，会用口水配合绒毛、草叶、植物茎秆嚟制作燕巢，俾幼燕喺燕巢入面孵化和成长。幼燕成长后，燕巢就会被弃置，采燕窝嘅人，就会喺呢个时候攀岩采摘。挑除绒毛草叶等杂物后，剩番就系金丝燕唾液为主要成分的食用燕窝。
中国人之所以识食燕窝，同明朝郑和下西洋有关。传说郑和嘅远洋船队喺海上遇风暴，停靠喺马来群岛一处荒岛，由于食物唔够，船员发现峭壁上有燕子嘅巢窝，于是采摘洗净，用清水炖煮嚟充饥。点知食咗几日，船员个个脸色红润，中气十足。于是船队就采摘一啲带回中国，由于郑和系船队长官，所以后人相信郑和系中国第一个食燕窝嘅人。不过长官点会乱食嘢吖？我觉得第一个食燕窝嘅人，应该系试过呢种燕窝冇毐先敢送畀长官食嘅勇士，至于系边个，咁就无从稽考了。
燕窝南瓜汤，系母亲节矜贵首选。
皇室御用够晒矜贵
不过郑和下完西洋后，带回国嘅贡品中，就一定有燕窝。之后当然系送上京师，进贡畀皇帝享用，当时嘅皇帝正是明成祖，咁第一个食燕窝嘅皇帝，极有可能就系明成祖嘞。自此以后，燕窝就成为宫廷御膳。明朝《宛署杂记》一书中，就提到南北官府嘅大宴会中，已有用燕窝做嘅菜肴，可见燕窝入馔当时已经流行。直到清代，食燕窝嘅人仍是非富则贵。清代梁章巨《浪迹三谈》卷五记载：「今京师好厨忆包办酒席，惟恰外取好燕窝一两，重用鸡汤、火腿汤、麻菰汤三种瀹之，不必再搀他作料，自然名贵无比。」清代文豪兼食家袁枚，亦对燕窝情有独钟，并写下制法：「燕窝贵物，原不轻用。如用之，每碗必须二両，先用天泉水泡之，将银针挑去黑丝。用嫩鸡汤、好火腿汤、新蘑菇三样滚之，看燕窝变成玉色为度。此物至清，不可以油腻杂之；此物至文，不可以武物串之。今人用鸡丝，肉丝，非吃燕窝也。却徒务其名，往往以三前生燕窝盖碗面，如白发数茎，使可一撩不见，空剩粗物满碗。不得已则蘑菇丝，笋尖丝、鲫鱼肚、野鸡嫩片尚可用也。」矜贵如此，你话今日系咪要请阿妈食燕窝？再讲一次：谨祝天下母亲，母亲节快乐呀。
蟹粉冬茸燕窝羮，大闸蟹季食就最应景。
