【饮食】有益食材｜番茄真系嚟自番邦？叫西红柿原来系错？
红卜卜。滑溜溜。甜甜哋。酸咪咪。
可以炒。可以煮。可以烤。可以焗。可以煲汤。
可以生食。可以用嚟做酱。仲可以打烂晒佢当汁饮。用途真系超级多。
番茄，含有丰富维他命C，又有茄红素，可以抗氧化，系人类嘅好朋友嚟架。
水牛芝士伴番茄，系好好味嘅意大利头盘菜式。
边度都有番茄
香港人，都好钟意呢个friend。佢入得屋企，出得餐厅。
睇下！阿妈厨房总有番茄炒蛋、番茄薯仔滚鱼汤，可以慰藉心灵。坊间唔少餐厅，更以番茄嚟做主题，好似蕃满门、红蕃茄餐厅、番茄师兄之类，餐牌全是各式各样番茄汤底粉面，番迷花多眼乱。就算高级餐厅，餐牌入面总唔少得佢嘅影子。法国菜有法式番茄浓汤、焗法式番茄酿肉酱。意大利餐厅嘅水牛芝士番茄，仲有各式意粉同披萨，都会大量用上番茄。日本菜亦有麻酱番茄，蛋包饭上亦唔少得要唧番几行番茄酱，唔系点似样。我哋中国人，都好钟意用番茄做菜式，好似内地嘅西红柿菜单，一系列就有西红柿焖土豆、西红柿蛋花汤、西红柿烩饭、西红柿炒鸡蛋、西红柿炒白菜……仲有喺深圳打边炉，一定食过冰镇砂糖西红柿呢味头盘喇啩！
番茄顾名思义，就系番邦来的茄，唔系中国原产架。
番邦传入的茄
只不过，番茄叫做西红柿，原来系错嘅。
话说番茄系茄科茄属植物，并非柿树科柿属植物，所以系茄唔系柿。至于西红，即西方来的红色的，也不够准确。因为番茄并非只得红色，也有绿黄橙等色。反而番茄二字，简而清，诉说身世。番，即系番邦，外来的，不属于中国本土。因此番茄，就是番邦来的茄。
系呀，据考证，番茄原产于南美洲西部沿岸安第斯（Andens）山区，后来扩散到中美洲，被马雅人及其他部落栽培，最早嘅栽培记录至少可以追溯到公元前500年。西班牙传教士德萨阿贡，就记载咗昔日阿兹特克帝国首都特诺奇蒂特兰，即今日墨西哥城嘅市场上，就有唔少人售卖各种番茄同番茄制品。之后随着西班人殖民者嘅足迹，将番茄带入欧洲。后来更跟住西班牙殖民脚步，传到加勒比海一带，甚至遥远嘅菲律宾，并在16世纪中后期进入中国。
番茄肉碎汤通粉，系唔少香港人嘅comfort food。
食茄会变狼人
16世纪，番茄已经喺欧洲同亚洲落地生根，不过要流行起嚟，并唔系一帆风顺。好似欧洲人，最初对番茄劲有戒心。佢哋流传一个讲法，系相传食咗番茄嘅人会变成狼人，番茄当时甚至俾人叫做狼桃（Wolf Peach），所以最初番茄传入欧洲，并唔系用嚟食，而系用嚟做观赏植物或药用植物。直到18世纪，才有人冒险食番茄，最后冇死，仲打破咗欧洲人对番茄嘅错误观念，到19世纪中，番茄终于登堂入室，成为欧洲人普遍食材。
至于中国，最早记载番茄嘅文献，系明朝赵函嘅《植品》，书中提到番茄系西洋传教士喺万历年间同向日葵一齐传入中国嘅外来植物。同代文人王象晋嘅《群芳谱》，亦有以下记载： 「番柿，一名六月柿，茎如蒿，高四五尺，叶如艾，花似榴，一枝结五实或三四实，一数二三十实。缚作架，最堪观。来自西番，故名。」及至清朝，番茄已愈来愈普遍，乾隆年间小说《绿野仙踪》中就出现过一句话：「不想他是个西番柿子，中看不中吃的歪货物。」可见当时番茄已是人人皆知。时至今日，番茄不单人人皆知，我哋中国更有唔少人认为番茄系我国原产，真是个美丽的误会。幸好，番茄呢个名，简单而扼要咁，记述咗佢嘅历史源由同品种，一讲大家就明，其实顾名思义就得，使乜写咁长篇！
