【饮食】民间美食｜鸡仔饼系工人姐姐发明？原来系用厨余剩菜整成？
后生仔，有冇食过呢味嘢？
鸡蛋咁大，椭圆一块。金黄外皮，夹杂疙瘩。咬落去，七分软熟，三分烟韧。面粉香、南乳香、猪油香，混合一起，咸咸甜甜，甘甘香香，超级惹味。小食嚟嘅啫，唔系顶肚饿嘅，一两啖就食完。但食过翻寻味，一块接一块，完全唔停得口。红咗好多年架喇，风行岭南一带，人人见到，都识叫佢个名。鸡仔饼，亲切到好似隔篱三姑个仔咁，系广东不可缺少嘅唐饼小食。
圆碌碌，胀卜卜，鸡仔饼望落又真系几似鸡仔。
唐饼四大天王
曾几何时，佢系唐饼舖四大天王之一。同老婆饼、光酥饼、杏仁饼齐名，当红嘅程度，就好似当年粤剧界嘅任白波靓，或者而家流行曲界嘅Mirror咁上下。唐饼师傅，个个都识整。南乳、胡椒粉、五香粉，又有冰肉、芝麻、榄仁。沟埋落面粉，搓成一团团，压成一块块，入焗炉一烘，就系香喷喷嘅出炉鸡仔饼。材料多呀，工夫又多，加上现代人觉得冰肉肥腻，唔够健康，整整下，愈来愈少人整，就算整，都偷减部分材料，以图符合健康，但就唔够惹味。好在仲有少数饼家，跟从旧时做法，南乳味足，肯落冰肉，仍然食到旧日唐饼嘅味道。
出炉嘅鸡仔饼，金黄亮丽，一排一排咁，引到途人猛吞口水。
婢女小凤所创
呢块鸡仔饼，唔经唔觉，有超过一百六十年历史架喇。源于广州海珠区，传说系当地一间叫成珠楼嘅食肆主人伍紫垣嘅婢女首创，据说件事起源，有唔同嘅版本。第一个版本，系话说1855年，即系清朝咸丰五年某日，伍紫垣喺屋企款客，撞啱家厨行开咗，于是吩咐婢女小凤，做啲点心招呼客人。老爷吩咐到，小凤即刻做，但揾匀厨房都冇乜材料啱用，情急之下，就将厨余剩菜加梅菜压成饼块，烘到香喷喷招待客人。客人一试，居然入口松化，十分可口，个个竖起大姆指。老爷见到点心如此受欢迎，索性叫成珠楼点心师傅照办煮碗，由于系小凤创作，于是叫做小凤饼，而广东人钟意叫凤做鸡，小凤小凤，慢慢变成鸡仔鸡仔。
好食嘅鸡仔饼，食到好香南乳同五香粉味，仲有猪油嘅甘香。
鸡仔变咗凤凰
第二个版本，系话小凤见厨房冇材料，就去成珠楼借用，将五仁饼馅同梅搓烂，加冰肉盐糖香料搅匀，用饼皮包好压扁，放入炉烤到甘香酥甜而成。由于饼形圆圆，十足鸡仔，于是随口叫做鸡仔饼。又因为系小凤所做，而鸡凤又相通，所以又叫小凤饼。无论边种讲法都好，鸡仔饼后来大红大紫，呢个就不争事实。上世纪二十年代初，成珠楼嘅鸡仔饼就荣获「展品赛会最优等奖」、1931年又获得「广州市国货展览会」一等奖，鸡仔于是飞上枝头变凤凰，一直红到今日呀。
鲤鱼门嘅年香园老饼家，仍然遵照古法制作鸡仔饼，风味依然。
