头条戏场丨《1人婚礼》陈健朗真心正啰

即时娱乐

更新时间：08:00 2023-02-10 HKT
发布时间：08:00 2023-02-10 HKT

讨论区有大量狠插此片的留言，又话烂片又话垃圾，烂片点都唔轮到佢，排吓队先啦。我属于第一批睇的观众，抱住睇「爱情喜剧」入场，嗱，当时宣传系咁讲㗎，原来一场误会，一早话系轻松温情小品咪好啰。散场后最有印象女主角阿冰啲靓衫，同埋白净又Cute的陈健朗，如此缤纷活泼的陈健朗真系好少见，根本就系2023年版的「百厌死仔」，推介睇埋制作特辑「陈健朗：被胡须耽误的喜剧演员？」睇傻仔笑睇到会心微笑。(上映中)撰文:廖思慧

情侣扮分手呃订阅
究竟呢套票房麻麻，场次不断被Cut的电影讲乜?主角阿冰(吴冰饰)和男友Dickson (陈健朗饰)是YouTuber，因为自家频道谷极唔起，呢对同居情侣为求提高点击率扮分手，然后女方再自导自演「一人婚礼」，因为够爆够勇够正能量，点击超劲，阿冰更成为「爱自己」KOL，吸引大堆Fans力撑，包括有强逼症的花店老板娘乐仪(卢巧音饰)，最后，阿冰突然觉悟呃人是不对的，然后勇于接受真正的自己。

阿冰一啲都唔差㖞

睇返周冠威导演的访问，原来曾经考虑tagline用「YouTube世代的魔幻童话」，因为童话世界的黑白分明，可以呼应现实网络世界的爱恨分明，其实用呢句好好多。主题几有创意，故事亦好完整，每位演员都好努力，最重要反映现实，游走网络世界唔使咁认真，搞掂自己先，坦诚面对真正的自己，好好爱自己先可以爱人。有人弹阿冰做得差，其实佢好可爱仲有啲似初出道嘅阿Sa，作为第一次绝对合格。不过导演有啲贪心，片长1小时55分，其实系咪真系要咁长?

翻查资料，上年套《阖家辣》都收3270万港元，呢套点会差得过佢，票房得318万港元?吓?