Cally - 开幕嘉年华圆满落幕「香港博物馆节」 11月60+活动接力登场 | 商界讲呢啲

更新时间：02:00 2026-11-04 HKT
发布时间：02:00 2026-11-04 HKT

　　上周末，大家去咗边度玩呢？Cally就去咗尖沙咀文化中心露天广场，凑热闹参加咗「香港博物馆节2026」嘅头炮活动——「缤Fun博物馆嘉年华」。现场真系人头涌涌！一家大细放电又有，文青打卡又有，气氛超正。

　　今年嘉年华主题系「拼贴今昔，香港故事」。Cally一入场，双眼即刻被三大巨型打卡位俘虏。首先有重塑昔日街坊风味嘅「格仔茶档」，坐低影相劲有怀旧feel。行过少少系「香江药号」。百子柜前，大家争住体验亲手「执药」，够晒过瘾。最惊喜一定系「Happy Fortune游乐场」神还原旧式掟银仔摊位！掟中的话，仲有专属签文俾你睇运势。好玩之余，集体回忆返晒嚟！

　　嘉年华又点少得免费手作？今次五大怀旧工作坊诚意爆灯。Cally技痒，亲自试玩「菠萝包黏土」同「布艺拼贴旗袍挂饰」制作。估唔到出嚟件成品精致又得意。同场仲有「凉茶牌锁匙扣制作」、「大押招牌彩绘」，以及极具环保意义嘅「月饼盒升级再造工作坊」等。大人细路都聚精会神发挥小宇宙，场面温馨又热闹。

　　两日嘅嘉年华虽然已经圆满结束，错过咗嘅朋友唔使失望！事关「香港博物馆节」贯穿整个11月，康文署辖下各博物馆及艺术空间将接力推出「特选节目」、「文化联乘」、「同乐日」、「展览及电影」以及「互动体验」五大系列，合共60多项精彩活动等你参加。今年博物馆节亦是第六届港澳大湾区文化艺术节响应节目，节目咁丰富，大家唔好错过啦！