李辰安 - 河水弯弯杨九斤｜辰来之笔
发布时间：03:00 2022-08-30 HKT
我细细个睇丽的电视，最深印象系杨九斤呢个角色，大家记唔记得？就系𠮶套《大地恩情》，真系好好睇，好睇到隔篱台嘅节目要腰斩。
大家又在中环小酒馆黄昏酒聚，靓仔侍应碧咸仔行过话︰「你讲河水弯又弯吖嘛，我老窦成日唱，卡拉OK招牌歌。」哥哥仔，世伯一家系关正杰歌迷？「系呀，佢话差啲去参加乜嘢十八区业余歌唱大赛，心水歌曲就系《大地恩情》。」我心谂，世伯好可能同歌神张学友同台比赛，仲要撞歌，到时要掷银仔，决定边个拣歌先。
「安仔，之前学校无教中国历史，我就推荐大家去翻睇《大地恩情》，因为呢套剧系好有心机拍，同时可以反映民初时代之中国国情。」大师兄，我好似揾唔到呢套剧之盒装VCD或者DVD，不过，依家上内地网站有得睇。「安仔，几时都有呢套剧DVD卖，你仲乜揾唔到？上网淘都有啦。」事实上，每所中小学都应该买一套，唔上中史都睇下呢啲咁有养分之电视剧，等大家知道中国乡情，尤其是故事取材今日之大湾区。
张翁今日简简单单饮啤酒，佢问我︰「呢套剧分三大单元，其中有讲北京故事，又有金山故事，当然，《家在珠江》最亲切。」系啦，最记得系《金山梦》，刘志荣（图左）饰演之杨九斤畀人卖去美国做果园工人。「卖猪仔，仲以为百几年前之事，原来依家都一样存在。」
银行伟话︰「睇见啲新闻都惊，卖猪仔最多去美国，电骗就可能去到东南亚集中营，唉，时代系轮流转。」系啰，咁啱《大地恩情》撞正《轮流转》。「安仔，你记唔记得结果如何？」大家似乎坐咗多拉A梦嘅时光机返到上世纪八十年代，好多回忆返晒嚟。
碧咸仔走过嚟凑热闹，问下大家两台大战到底是否丽的胜出。「上网揾到资料话︰无线决定腰斩《轮流传》，派杜琪峰连夜赶拍《千王之王》收复失地，打败《大地恩情》。」
我就好似唔多觉当年大台反败为胜，事关你腰斩就当你输唔晒，都系投降输一半，《千王之王》系王晶起朵之作，与王天林拍挡创佳绩，成为电视台佳话，至于杜琪峰乃王天林徒弟，亦乘势而出，真系奇迹剧集，不过，一套还一套，大家几十年来之集体记忆系《大地恩情》KO大台，你话《千王之王》改变战果，我就唔多认同。
「安仔，读书又唔见你咁认真，你不如去电台讲故仔，好唔好？」大师兄，咁又唔系咁讲，历史就系历史，大家要尊重。「两位世侄，唔好挂住讲，快啲饮多杯，今日都好翳焗。」讲开又讲，当年丽的无法凭一剧追回败局，始终要屈居第二，好唔抵。
「有乜抵唔抵，你知一个趋势形成了，就会顺住行，顺头顺路，个天都改变不了。」系，就好似百几年前，中国几努力、几有决心都改变不了又穷又落后之环境，成日畀人虾，中国人生活好艰难。「之不过，今时今日，个势喺中国呢一面，其他大国列强想搞我哋亦无符，都系𠮶句啦︰轮流转。」
杨九斤去澳门畀人卖猪仔，原来当年系好平常之事，因为澳门出晒名做人口贩卖生意，你行过路过，好易畀人卖猪仔。「今时今日，古老当时兴，香港、台湾忽然有好多杨九斤故事，更加想唔到，呢一门生意又有如此多人中招，真系世界艰难。」不过，几艰难都唔及民初时代，大家千祈咪误信人言，更加不要有贪念。
「安仔，你都九唔搭八，骗徒手法层出不穷，防不胜防，我日日都收唔少垃圾信息，话有笋工介绍，上网更加有好多广告如是说，当局同相关网站要睇实。」讲开民国时代，除咗有人卖猪仔，亦有留学生剪辫投身革命，好似潘志文、刘松人饰演之角色就好正气。依家有无人会做革命志士？「安仔，饮多杯啦，革命志士喺黄花岗，唔好讲咁多，通关之后，同你上广州旅行，去埋黄埔军校开下眼界。」
通关？我都唔知几时可以返大湾区，三年啦，就快三年零八个月，我都无乜寄望，总言之随缘。「大家饮埋呢杯，准备去隔篱小厨食晚饭，今晚有八宝鸭，认真难得，我早两日订好咗，值得一试。」好，真系好，今日有食神，大家开开心心又一日，今晚无事做不如上网重温三几集《大地恩情》，几叹世界呀！
