MC恨演反派望续集变做卧底 林家熙栢天男盼开《误判2》跟甄子丹再学打丨独家
发布时间：07:00 2024-12-23 HKT
MC（张天赋）、林家熙（Locker）和栢天男（Adam）在电影《误判》跟身兼监、导、演的甄子丹首度合作，他们坦承拍一套未够喉，望开续集可以跟甄子丹学嘢继续打。今次打到抽筋又嫌有肚腩的MC，好想再拍时操返fit一雪前耻，仲想挑战反派角色，提议「李Sir」可大玩变节做卧底。采访：杜杜 摄影：孔子 发型:Cliff Chan@Myös(MC)、Lupus Chiu@O4(Locker)、Kenki(Adam) 化妆:Tammy Au(MC)、Will Wong(Locker)、Kyo(Adam) 服装:Givenchy
难得甄子丹主动邀合作，MC透露背后有段故，「听闻系佢一个好朋友介绍，都多谢佢同埋多谢佢嘅朋友，系透过音乐认识我先。」告知他除了歌曲令甄生留下印象，还因亦正亦邪外形，切合「李Sir」角色冲动性格，他搞笑话：「所以我用好运同好彩去形容，亦都要多谢妈咪赐咗呢个亦正亦邪嘅样畀我。」
国际巨星全冇架子
跟国际级的甄生合作，3人都话压力未有想像中大，MC说：「见前我系好担心，会有好多想像见前辈会唔会好有气场？但见到佢其实好friendly，第1次都几倾得埋，后尾冇乜担心同埋压力，佢都知我系新人，会畀好多包容我。」Locker 都奇怪竟然冇压力，「我都谂点解呢？又真系谂唔到，但绝对系好事，我哋新一辈演员同前辈合作，如果冇紧张、压力，会演得轻松啲开心啲。」Adam虽然跟甄生对手戏不多，但无阻两人沟通，他更直呼前辈英文名，与前辈以英文吹水，「我哋会研究啲角色喺边度嚟，我冇谂过同甄生会有机会倾呢啲，都好惊讶，唔知道Donnie咁肯用英文讲嘢，呢次合作后friend好多，跟佢学咗好多嘢，多过畀佢打几拳。」
MC嫌肥肚腩碍眼
拍得甄子丹作品，动作戏当然不能少，MC坦承演戏经验不多，《误判》更是首次挑战动作片，最初好担心，「开头知要打交，曾经拍过戏有少少系动作场面都辛苦，所以好担心自己应付唔到，甚至乎会整亲或者太辛苦，后尾发现佢嘅团队处理好专业，就解决咗我嘅担忧嘞！」团队会因应MC能力去设计动作，反而是他认为自己准备不足，「啲动作以我嘅水平，譬如对脚可以踢得几高去设计，相反我睇完戏觉得我身材有多进步空间，之后我系好畀心机锻练我嘅身体。」他嫌自己不够肌肉线条，拍打戏时唔够好睇，「啲衫好贴身，贴完身仲要湿身呀！」动作戏应该可以分散注意力？Locker和Adam搞鬼话：「人哋慢镜逐格睇睇啲肥肉喺边度！」MC无奈话：「逐格睇个腩都……唉！」Locker安慰他说：「可能啱角色，督察系有啲㗎啦！」MC唯有期望有下次机会一雪前耻，「如果有续集，或者未来希望再sharp啲形象示人，有乜可能毒贩仲fit过我㗎！」Locker和Adam再安慰，「咁我哋要走佬㗎嘛！」
各有难忘拍摄场面
讲到戏中难忘一幕，戏中演督察「李景威」的 MC，会拣单拖捉贼，因当中牵涉太多不熟识领域，「场戏拍咗好多日，临尾有啲改动，要再搭景拍多次，当时都辛苦，但真系好好玩。」他最深刻一个动作镜头，「有幕讲我要避两吓跟住踢脚，我系立即抽筋，但roll紧机唔可以嗌痛，就好有型咁扮企喺度，但后面只脚抽咗筋，要企到好直，拍完佢哋问我做乜唔郁，我话抽筋呀，哈哈！」演毒贩「陈国荣」的Locker，最难忘是最尾上法庭一幕，因角色精神状态难处理，「𠮶个状态真系经历咗太多嘢，又撞车、畀人打，精神又有啲问题，又畀人逼，终于见到个仇家，所以系好攰。」演毒贩「刘少强」的Adam，最难忘是做有型大佬，「我几享受做夜总会老板，我啲𡃁唔少，都几好玩，未试过呢个感觉，有咁多保镖，咁多𡃁保护我，同埋同甄生系对立，冇谂过有呢种对手戏。」3人坦承跟甄子丹合作一套未够喉，好想《误判》再拍续集，更不介意比今次打得更甘， MC更谂埋「李Sir」角色发展，「呢套戏只系初出茅庐，可以讲前期或者后期有返啲历练嘅『李Sir』，我系好钟意港产警匪片，有时反派盗亦有道，正派亦一样有坏人，好钟意睇𠮶个拉扯，我都想演反派，或者『李Sir』叛变（做卧底？）都好㖞！」Locker补充：「跟住我就洗清底，跟咗佢。」Adam说：「拍《误判2》！」
