郑丹瑞拍《得宠先生》中暑晕倒 轰卢慧敏「见死不救」 廖子妤：系咪以为你做紧戏？
发布时间：21:15 2024-12-01 HKT
由郑丹瑞（旦哥）、卢慧敏（Amy Lo）、廖子妤（Fish）合作的新片《得宠先生》上映，近日四出谢票宣传，旦哥被爆料拍摄期间中暑晕倒地上，卢慧敏与导演误以为他即兴加戏，事后旦哥笑言指责他们见死不救！
旦哥坚晕倒被误会做紧戏
旦哥忆述中暑晕倒当日在狗舍露天空地，拍摄一场他与Amy Lo打扫的戏份：「当时中午1点几，又唔放饭，电影就系咁，导演又唔肯放饭，30几度，好晒，𠮶场戏我洗紧狗屎，突然眼前一黑，我就『嘭』一声瞓低。后来有工作人员话我知，当时我同一个石级只差少少，如果一撞落去就『系咁先』！」旦哥又搞笑说：「𠮶日我睇到人性嘅冷暖，尤其是呢个Amy Lo，得我哋两个人做戏之嘛，我『嘭』声瞓咗喺地，佢只系望住我！」Fish好奇问：「系咪以为你做紧戏啊？」旦哥说：「所有人都以为我仲做紧戏！因为之后导演同我讲，佢当时心谂『做得几好㖞……点解仲唔起身？』」Amy Lo说：「系呀，事后我哋全部吓到黐线！当时真系以为佢扮晕。（你唔会谂剧本冇呢场戏？）佢成日即兴，我当时心谂『都几夸张㖞』，因为当时旦哥坐喺一张普通凳上，跌落地，普通人都系好大件事，𠮶日佢仲包住条腰，有腰痛。当时一部摄影机拍住我，另一部拍住佢。佢跌倒之后，我心谂：『死啦，导演未嗌cut㖞，我继续演自己𠮶部分。』因为我谂起周星驰𠮶句『导演未嗌cut都要继续演』！」引众人爆笑。
旦哥笑言唔好意思休息咁耐
此外，有惊无险，旦哥回复清醒，他笑说：「当时导演走埋嚟关怀备至问候我，然后俾咗两个选择我，一系依家继续拍，一系休息一阵继续拍！然后我自己会谂，如果我系导演我会点呢？我都系会叫演员继续拍，因为时间好紧迫。」他笑言后悔：「我应该做返一个演员，坚持要返屋企。」他还反过来安慰导演。又说：「佢哋揾咗间房，有冷气嘅，畀我休息、瞓吓，但佢哋不停入嚟问我『得未』。作为监制、演员，又做过导演，我好理解，所以真系唔系几好意思瞓咁耐，结果𠮶日我真系拍晒。唔好以为电影世界好残忍，其实经常都发生！」
旦哥强调剧组好有责任心
Amy Lo透露其他工作人员亦有苦自己知，旦哥强调大家都好有责任心，一句「无事无事」继续工作。他说：「香港拍电影就系咁，时间又少、成本有限！」Fish说：「所以希望大家支持香港电影，等大家成本高啲，令到中暑嘅人得到妥善嘅照顾！」
