终于到我们中咗…… Covid︰无咗味觉似大感冒
[年头回顾年尾篇]
英国 Covid 情况严峻，确诊个案差不多日日十几廿万，而我们亦「有幸」为数字出一分力，全家齐齐确诊。
话说圣诞前个多星期，细仔放学回家好唔对路，攰又无神无气，仲有少少发烧，一做快速测试，就系双线 positive，之后立刻上报学校，提早放圣诞假。虽然佢已经自我隔离房中，但最后，全家人都陆陆续续 postive 确诊，呢个圣诞就在隔离同休养中度过，就算圣诞餐都只系简简单单焗只鸡，配个预早订来的圣诞 Cheesecake 就算。
在香港中 Covid 好大件事，英国实在太多人确诊，就算 lateral flow test 快测系 positive，都系叫你上 NHS 网站免费 order PCR TEST (即系撩完咳咙再撩鼻个只) 再验，PCR TEST Kit 邮寄到家中，做完寄去指定地址的 Lab，就有更准确的结果。经验话我知，其实屋企做的快速 test 都好准确吓，两者结果基本上系一样，无假阳性的情况。(而现在甚至唔使做 PCR，快测 positive 就直接 isolate。)
好了，4 个同屋人中 Covid，照计大家都中同一只菌，咁系咪大家病征都一样呢？原来又唔系㖞。
1. 细仔︰率先发病的细佬主要病征系无胃口、好攰、有少少烧同喉咙痕有几声咳。第二日已经无烧，第四五日直头觉得佢已经好番。
2. 老公︰细仔验出之后两日发现，头两日无大病征。第3日唔觉意屋企「摄」亲，却突然发冷同发起烧来，之后就开始周身骨痛，无胃口大病咗几日。
3. 我︰我是老公之后再 3 日确诊。病征极似大感冒，头重重赤赤痛，周身骨痛，有鼻水有几声咳，成日想瞓。而我系唯一一个真系无咗味觉的！系呀，食嘢只感觉到温度、咀嚼到质感，饮汽水得啖气，却完全无味道，原来呢种感觉系非常诡异。
4. 大仔︰在细仔中招之后十日才验出，只有咳的病征，精神仲唔错。
香港家人问我︰有无得睇医生食药㗎？要唔要入院㗎？如果唔系有严重病征与并发症，一般都不会入院医治，在家医病靠食成药，头痛发烧食 Panadol，咳就食止咳药，再加埋感冒药同维他命 C 就是了。在我们隔离期间，英国政府 update 咗政策，只要在隔离第 6、7 日家中 self test 两次都 negative 便可以出关。不过，我发现我家 4 个情况都系至第 8、9 日才出现 negative result，隔离 10 天比较隐阵。
感恩我们大致都已康复，针炙食中药后，味觉亦在 3 星期后渐渐恢复，隔离期间亦有街坊帮忙买餸，令我地三餐无休。
