胡慧冲 - 今个周末双喜临门 | 笔泰冲动
胡慧冲
2025-05-23 02:00 HKT
字體大小
今次回港头尾接近15日，先系为好朋友结婚做司仪，跟住有一啲商务合作，但重头戏系今个星期六、日。话说泰国政府旅游局香港办事处每年都会搞泰国节，今年都唔例外，但转咗场去咗钻石山荷里活广场举行，除咗我之外，亦都有冬荫妹同佢先生、囡囡一齐嚟参与支持。当然除咗我哋照例载歌载舞，亦都会有好多抽奖游戏，有机票、酒店住宿送畀大家，亦都有好多旅游配套嘅优惠，而小弟嘅产品「肥黑师兄」都会在场有售。一连两日我都会喺度同大家开心分享，开心合照！
此外24日晚就更加系中村雅俊演唱会嘅大日子！等咗几廿年终于等到呢一日，仲可以近距离听偶像唱歌，当年嘅青春片段终于可以重现眼前。据说今次都有好多娱乐圈朋友到来支持做观众，因为佢实在系一个乐坛传奇同神话，对于好多香港人嚟讲直头系集体回忆！小弟亦都将一些有关中村雅俊嘅收藏借咗畀主办单位，大家买咗飞入场之际都可以睇到欣赏到，完完全全将自己嘅开心快乐同大家一齐分享。希望𠮶日唔好塞车，六点几钟完咗泰国旅游局嘅活动我就会往湾仔新伊馆出发，希望到时演唱会上大家都一齐唱、一齐拍手、一齐欢呼！星期六、日两天希望见到大家。
胡慧冲
今个周末的泰国节希望大家到来支持。
更多文章
