古星辉 - 「古灵精怪」的5G直播 | 乜都5G
上月中，笔者与网络部嘅同事，出席本年度香港艺术发展奖颁奖礼。好荣幸，我哋喺旧年赞助全港首个邮轮5G海上直播嘅项目，荣获「艺术赞助奖」。我哋喺海上做5G直播嘅大胆尝试，得到认同。
5G直播自推出以来日益普及，用四个字就可以简单概括5G直播嘅内容及特色——「古、灵、精、怪」。
「古」：古典、古今中外
直播并非新鲜事，系5G为直播赋予咗新意义，常用于音乐会及艺术表演。刚推出时曾应用于寺院嘅「一念一花」音乐会，配合航拍，以360度全景4K高清直播至全球各地。仲有各种国际艺术展览，以至于今年中乐团新乐季将举行嘅鼓乐嘉年华及5G直播音乐会等，可见5G直播一直为全球观众带来中西荟萃嘅内容及高清嘅视觉体验。
「灵」：灵巧、灵活多变
应用5G直播方案，事前毋须作大型安装，配备装置方便易携嘅高质素摄录机、5G智能手机等即可；比起传统嘅卫星直播同固网宽频更加灵活及有成本效益，不受场地限制，室内户外直播，海陆皆通。
就好似我哋获奖嘅邮轮5G海上直播，就打破咗场地限制，喺海中心航行紧嘅邮轮上直播音乐表演，让全球观众体验与现场演出同步嘅声画。
「精」：精密、精彩绝伦
今时今日嘅5G直播，已经可以传送高达8K解像度嘅影片，画面细致高清，对观众来讲，极具现场感。若再配合推陈出新嘅头戴式装置，更能提升视觉享受。
最近市场上出咗一种可提供沉浸式声画体验嘅空间运算装置，虽然目前只有Wi-Fi支援，但假以时日有5G版本，配合埋5G直播，相信更能达到亲历其境嘅效果。
「怪」：趣怪、千奇百怪
创意系5G直播内容嘅重要元素，除咗音乐表演等一般应用，早前喺内地农村就有网络商试用5.5G直播带货卖荔枝。简单如农产品买卖，动用到尖端嘅5.5G直播，既有趣亦创意无限。
事实上，5G直播不仅为企业及艺术团体而设，亦适合补习社、教育机构及KOLs。直播仲可以加入即时网上售票、留言或捐款功能，开拓更多机遇。
和记电讯香港执行董事及行政总裁
古星辉
