古星辉 - 智慧城市新指标｜乜都5G

乜都5G

古星辉

2022-07-22 00:00 HKT

阅讀更多

产经专栏

內容

香港通讯事务管理局（OFCA）不时会喺网站公布同更新本地通讯业嘅统计数字，其中「香港电讯指标」、「流动电话服务」同「互联网及公共Wi-Fi服务」等有关数字，对于想了解业界最新情况嘅人有好大帮助。

其中，传媒经常引用嘅数字，例如按人口计算嘅流动服务用户渗透率，截至今年3月嘅最新数字达291%，即系话每个用户大约有三张SIM卡，足以令香港嘅流动服务渗透率成为全球最高嘅地区之一。

笔者早前宣布开通700 MHz 5G频段嘅基站时，就同同事提起「5G家居宽频渗透率」呢个新名词，方便我哋掌握5G家居宽频嘅普及速度。

「5G家居宽频渗透率」即系咩呢？呢个数字其实好有新鲜感同前瞻性，因为时代进步，上网已经唔再局限喺光纤到户，目前最潮最chill嘅上网方式系5G宽频。我将「5G家居宽频渗透率」定义为：全港5G家居宽频住户数目 ÷ 全港总家居住户数目。5G家居宽频系一个5G应用方案，佢嘅渗透率对智慧城市发展嘅进程有一定参考价值。
5G家居宽频潜力庞大

疫情反复，家庭成员无论在家工作或学习，对宽频嘅需求都有所增加。o依家5G宽频逐渐普及，月费已经包埋5G路由器，即插即用；唔使安装、唔使拉线，搬迁嘅话，打个电话就得，而且业界各出奇谋，吸引客户试用5G宽频上网。现时最吸引嘅月费低至88元，固网宽频真系招架唔住！5G覆盖嘅地方广阔，对于传统低密度住宅区、偏远地区同村屋嘅住户，以至居无定所、经常搬迁嘅人士嚟讲，真系上网嘅突破！

众所周知，5G嘅频宽够阔，喺英美早已广泛应用于家居宽频，填补偏远地区未有光纤到户嘅缺口。香港目前有超过264万住户，5G家居宽频无论系作辅助用途，或者系未来取代固网宽频，巿场潜力一样庞大。

当更先进嘅5G路由器上巿同普及后，5G宽频上网嘅速度更能达至数以GB计，加上88元呢个月费冲破晒心理关口，一个家庭装返两三个5G家居宽频都绝不出奇，相信假以时日，「5G家居宽频渗透率」会冲破100%！希望唔使好耐，我哋喺OFCA嘅网站，就可以揾到呢个咁有代表性嘅数字。
和记电讯香港行政总裁
古星辉