乜都5G｜走出5G结界

古星辉

2022-01-07 00:00 HKT

阅讀更多

內容

■两大美国电讯公司Verizon与AT&T愿意按当局要求，延迟推出C频段（即系4-8GHz）频谱的5G服务。资料图片

2022年伊始，祝大家身体健康，新年进步！

前几日朝早睇报纸，见到AT&T同Verizon两大美国电讯公司企硬，表示唔会再理当局要求，会如期喺1月5号推出C频段（即系4-8GHz）频谱嘅5G服务。点知事情发展峰回路转，食完晏返公司就睇到网上新闻话两大电讯商已经让步，同意延迟两星期推出5G服务，等当局有时间再处理5G与航空安全嘅问题。有时，要做好一件事，难免要互相迁就。
电讯商协力助港成5G智慧城巿

话时话，香港当年准备推出5G嘅时候亦非一帆风顺，业界经常都要跟唔同持份者协调。最记得早期讲嘅5G禁飞区（有人叫5G黑洞或5G结界），范围包括大埔、沙田、马鞍山、粉岭同赤柱等，影响差唔多过百万人口，当中仲包括中大同科学园两个科研基地，佢哋用唔到5G的话，对香港嘅科研发展有重大影响。

由于5G需要较多频谱先可以发挥威力，少不免要同其他服务正在使用嘅频谱重叠。所谓5G禁飞区，系指电讯商唔能够喺有关范围用宽频较多、穿透力较强，俗称「黄金频谱」嘅3.5GHz频谱提供5G服务，原因系呢个频段同禁飞区内卫星服务所使用嘅讯号重叠，为免互相干扰，所以呢个范围嘅5G服务要暂时让路。我哋业界出名够灵活，加上方法总比问题多，喺同有关部门协调嘅同时，有人改用4.9 GHz频段，亦有人重耕2.1 GHz频段用嚟提供5G服务。总之大家同心协力，尽量将对客户所造成嘅影响减至最低，同时又平衡各方利益，大前提系唔好阻碍香港发展成为5G智慧城巿。

就咁样，香港推出5G服务好快就嚟两周年喇！半年前，听闻两个喺大埔嘅卫星站已经着手搬去赤柱舂坎角，有关当局仲话禁飞区嘅问题可望喺2024年底前「彻底解决」。我哋距离解决5G禁飞区问题又近一步！有咗呢个初步时间表，业界喺未来嘅5G发展部署更加心中有数。
和记电讯香港行政总裁
古星辉