阿碌开咪｜美食车死因研究
《名家合集》收录名人文章，分享观点，探讨时事。
2021-12-30 08:58 HKT
字体大小
时光倒流几年前，老友「乐观P」有日拉我讲：「碌Sir，发达！终于投到个美食车牌，可以呢度去、𠮶度去，卖我的拿手自家研发美食喇！」
我一听，哎吔吔，惨！立即泼佢冷水：「P仔，千祈千祈唔好做啊，瓜硬㗎！美食车在香港，必定变日本大邮船——迟早完！你信我啦。冇咗几十万元投资外，更会打残你对做生意嘅信心及雄心壮志㗎 ……」
当日P仔已经上晒火，当然唔会听小弟忠告，反之，摩拳擦掌去马。结果好嘅唔灵……其实唔使先知或有乜乜水晶球，稍认识官场政治者，必知道——美食车阴干可期！
点解？未讲点解，先讲讲为乜全球大商家咁怕政府高官？无论任何巴闭巨富，都要千方百计与官员打交道。无他，富豪虽有钱，但做官则有权，加上政府规章保护，想玩你，容乜易？
简简单单如一张消防装置图或者建筑图，快批与慢批，随时拖到你唔见天文数字金钱！
再大啲，订政策的，若少少倾斜，产生的财富效果已经不得了。所以，千祈咪得罪官！此乃商场的金科玉律。
不可得罪，咁点玩？倒转搞关系啰。
点搞？各师各法，今日唔爆得咁多嘞。最低手就系赤裸裸送个鲍鱼果篮上门，仲要畀人设局影埋踢爆。真是下下之手！高手？你话呢？
讲返美食车，我强烈劝喻P仔咪搞的原因，其实一字咁浅，美食车乃曾俊华的Baby是也。曾俊华在上届特首之战，与林郑月娥打生打死，辩论直播中，佢窒到林太一戙都冇，只好尴尴尬尬地苦笑。但小弟一睇，已知若林郑一旦登顶，曾俊华及所有佢的「马房」及Baby，全部肯定冇运行，逐一被阴干式处理。
此乃最简单的官场政治。当林太坐上特首位后，佢完全唔使畀指示点处理美食车，总之所有下属都会自动识做，尤其负责的商务及经济发展局。
在政策上，必会积极「招呼」，直至……直至乜？直至美食车失血过多，自动收档去。
曾智华
阿碌开咪
美食车先导计划将于明年6月结束。资料图片
最Hit
八达通大派$400增值额！简单2步登记即赚$100 消费满额再赚$300（即睇领取教学）
2026-03-17 13:14 HKT
中电节能家电更换计划｜3类人可获$2,700资助换电器！长生津长者都有份
2026-03-16 19:32 HKT
金钟太古广场天一酒楼结业！一笼虾饺索价近$90 网民：预任人宰割，但食物超好吃
2026-03-17 13:20 HKT
「Her be like...」中一生Starbucks温书遭阿婆质问 地道「港式英语」挑机引爆网络：你睇得明几多？｜Juicy叮
2026-03-17 16:48 HKT
更多文章
