结婚廿年发现「老公出面有女人」人妻濒崩溃网民咁开解......｜Juicy叮

趣闻热话

更新时间：07:34 2023-05-01 HKT
发布时间：07:34 2023-05-01 HKT

一名结婚20年育有3名子女的资深人妻，早前以「发现老公出面有女人，仲系有夫之妇」为题在网上「香港讨论区」发文，纠结是否拆穿事件，与丈夫摊牌。

回应的网民各有心思，有人劝「静观其变、冷静、唔好小事化大事」，有人著眼于钱银及子女，建议「搞清楚自己的经济状况先，考虑到子女，把个人情绪放低先」，并忠告「三思，三思，三思」。

楼主帖文及网民回应：

楼主发长文表示：「我同老公成20年感情，有3个仔女，佢对屋企畀足钱。但一向好少理家中嘢，大部分时间都系我和他阿妈打理。

我知道佢一向有喺出面偷食，但果D系建立系金钱上面。我只眼开只眼闭。但最近发现他同一个女人（有老公）动咗真感情。而且佢会夜晚每隔一至两日就见面。在家一直微信。一直keep（保持）住，因为个女人话明，我老公唔使系佢身上使钱。因为个女人有钱」。

楼主续指「朋友叫我唔好拆穿佢，就当大家搭伙过日子，因为仔女行先。但我一时三刻都好难做到。因为心里面仲系有佢」。

楼主回应网民时指，「我并无大吵大闹，因我唔系一哭二闹三上吊嘅女人。因为知道老公同外面女人对话（自己暗中查到），佢地两个都以不想影响自己家庭。但会一直保持互相联系，或者两人有相同嘅话题。就算我暗示过（做出这些行为时可否考虑一下我感受）。佢可能老公为咗仔女，应该暂时都唔会同我离」。

她续指，「相处20年感情，唔系短时间。我比较重感情。我最年轻20年都畀晒头家同佢……生活重心都在家庭。唔系一时三刻可以当佢死」。

网民回应：

「比著我真系接受唔到，会离婚」、
「搞清楚自己的经济状况先，考虑到子女，把个人情绪放低先」、
「你要学吓当老公死咗，话知佢做乜，只要俾钱养家，你就老定。到仔女大个，就系你嘅天下，到时你去边都得」、「嘅然老公变心，为咗仔女，相信行呢步都系权宜之计」、
「3个小朋友。如果你要离婚，想要几个？然后自身能不能满足到以后的生活。如果唔得就系要考虑。忍唔到又唔想离婚住就直接讲咯。你出去搞，但返来唔好搞我就得了」。

另有网民详细分析：

•「首先，妳要谂清楚妳拆穿佢的后果会系点？佢会改过？定系会离婚？离婚后妳带住三个细路点样生活？20年了，妳年纪都唔轻啦！估计妳亦唔会再揾另一个男人，所以我劝妳都系当唔知算啦。佢地系咪真系有感情，要佢地自己先知的，或者两个都只系玩玩下，当然最终决定点做，系妳自己的决定！三思，三思，三思」。

•「如果楼主主动提出离婚，而离婚，咁......你损失更大、返唔倒转头同后悔。老公大不了玩吓玩吓，好似细路哥玩玩具咁，迟D就会厌。你无小朋友而离婚尚可以，而家有三个，就唔系咁简单。就算你大把钱养得起，唔使靠老公，但小朋友唔可以失去父母。你再嫁老公再娶，都唔系小朋友亲生父或母。做个好妈妈，唔使教老公做人，佢都咁大个」。

•「首先
1) 你小朋友几大
2) 无咗佢嘅金钱，你自己可以应付几多？
3) 小朋友分配
两条路：拆穿同扮唔知
要谂下自己拆穿之后嘅生活，如果接受唔到佢出轨，你又应付到生活嘅话头都唔回啦。相反如果仲好爱佢，又接受唔到后果，又唔舍得失去佢，唯有死忍」。

•「女人一系做好妈妈、好新抱，一系做好老婆。要两样都好，好难。女人做好老婆系孤注一掷，好冒险同好靠唔住。因为男人天生花心漂泊，家有温暖都好，佢走出去滚吓，有夫之妇又好，离婚妇又好，有两点要知，佢是咪大家讲到明有家庭同偷情，动机为乜。
站在楼主一方，要静观其变、冷静、唔好小事化大事。如果系叻男人，佢自有分数。你暂作唔知，以及对老公好D甚至温柔D。等佢明白老婆心知肚明但唔搅大佢，要老公适可而止收敛，咁.....你就成功。

注：本人已婚四十多年，过往亦有多次婚外情，而老婆起初亦睇唔开，要自杀。但经过我嘅处理方式及用心，到今时今日，我D婚外情人系好朋友，太太依然深信我系爱佢一辈子」。

帖文来源：香港讨论区