【圣诞好去处2020】盘点各区圣诞商场特色布置 留港都可以有欧游感觉
发布时间：18:00 2020-11-24 HKT
临近十二月份，一家人准备迎接圣诞节长假期，无得去旅行嘅情况下唯有留港消费。本地唔少大型商场都有圣诞活动，有唔少圣诞布置畀香港人打卡影相，止一止旅行瘾之余，唔少地方嘅圣诞布置都设计得非常靓！
一、The LOHAS九米高圣诞树 一家大细打卡之选
位于日出康城嘅The LOHAS，圣诞前夕就布置咗一个九米高嘅巨型圣诞树，而且仲有一个充满圣诞气氛嘅小庭院。庭院入面，有圣诞老人办公室，可以畀小朋友透过玻璃窗，睇下圣诞老人系点准备礼物同回复小朋友信件。如果小朋友问起圣诞老人嘅故事，家长不妨带佢地去康城睇下，就唔需要谂到头都大啦！
另外，11月26日仲会有全港最大间嘅NAMCO喺康城开幕，可以睇圣诞布置之余，亦不失为一个小朋友游乐嘅好去处。
二、青衣城互动光乐装置 情侣打卡一流
如果担心室内人多挤逼，青衣城嘅圣诞布置都值得一去，有本地初创企业设计嘅互动光乐装置，名为「听风的森林」。「听风的森林」由110组风动光乐装置组成，每组装置都有唔同嘅声效同灯光，每当有风吹过都会发出风铃声，感觉就好似置身于挂满风铃嘅森林入面，而且仲有光效，啱晒情侣打卡！
三、1881活化古迹变欧陆古国 彷如身处冰岛小镇
除咗康城同青衣城，位于尖沙咀广东道嘅1881前身系水警总部旧址，经过翻新同增添圣诞布置之后，广场位置有8米高嘅圣诞树同5米高巨型北极熊公仔，配合圣诞灯饰，令到整个广场好似异国小镇一样。而且旧水警总部嘅建筑物，本身都系以英式设计建造，配合圣诞气氛，非常有冬天欧游嘅感觉，畀人止一止旅行瘾之余仲可以影相打卡，非常适合一家大细同情侣。
四、中环ifc商场 用AR程式创造属于自己的圣诞小镇
圣诞布置固然非常吸引，如果再结合AR扩增实境技术，就可以令到简单嘅布置变得生动。中环ifc商场就为圣诞节推出特别活动，访客可以用AR技术创造自己嘅圣诞小镇，透过手机将ifc变成自己设计嘅模样，仲可以录成短片转发畀朋友。咁就唔怕同其他人撞背景，完全独享属于自己嘅圣诞布置啦！
五、置地广场圣诞市集 浓郁欧洲小镇大街气氛
如果冬天去欧洲旅行，街道上总会有一丝肉桂香味，配上欧陆式传统建筑同埋圣诞气氛，简直好似亲临电影世界一样。中环置地广场就将室内变成圣诞市集，将商场布置成欧洲小镇大街一样，一排排圣诞树以及旧式街灯，统统都充满传统欧洲味道，唔讲仲以为将一条欧洲街道搬入商场，不失为圣诞好去处！
