以伊＋议息分析等待无预警快闪坏消息｜晋佳

更新时间：18:08 2025-06-19 HKT
发布时间：18:08 2025-06-19 HKT

港股投资者今日比较欠运，适逢美股周四假期，一次过反映以伊局势担忧及联储局议息冇惊喜嘅因素，想避险，冇得沽美股自然要向港股埋手，就当港股因为呢个技术因素而跌凸，恒指跌2%已经唔算甚么大镬嘅事，整体而言，投资者系冷静嘅。

美股期货暂时跌0.5%，亦唔算多。一方面因为联储局主席鲍威尔维持保守审慎言论，打定开口牌暗示最迟9月有可能预告减息（睇怕最迟11月减息），算系冇惊喜。以联储局近年作风，会喺最后一刻突然变脸放鸽，最快变脸放鸽嘅时间会系下次7月30日议息，到时睇埋特朗普同多国关税点样落实，估计大概维持向大部分国家收10%关税，即系4月初之后冇再加税，到时减息条件或许出现。

美国征收10%关税嘅效应由4月初展开，直至5月数据都未见物价出现显著月率上升，如无关税因素，通胀早已放缓，所以美国减息嘅条件较大机会喺9月或之前达成。

假如减息能够喺9月发生，7月30日前后就可能美股展开升势嘅时间，加上近期关税忧虑令企业拖延招聘、减慢投资、消费者延迟购物，阴霾减退后，经济动力会回稳，形成减息同时经济慢增长剧本，同时AI带来企业收入增长机会以及成本缩减憧憬，估计美股下半年表现相当唔错。

至于返去以伊局势，呢一刻其实并非一面倒向淡，仲有伊朗愿意妥协嘅可能，而美国只会喺确保资本市场冇大动荡之下行事，最American style系美军出动钻地弹快闪攻击福尔多、同时宣告行动完结，将坏消息同负面消息见底时间同时出现，极速缩短股市挨沽时间，Wait and see。

↓即睇减息部署↓