星8卦｜「肥婆」唔玩得臭品扮公主被扯甩假发发癫得罪全世界

更新时间：11:30 2023-11-28 HKT
发布时间：11:30 2023-11-28 HKT

「肥婆」臭品全行知，都唔明点解佢老公顶得顺，可能佢对住老公又第二个样。「肥婆」出道至今状态都唔好，但因为有「输哥」睇住，你话系咪有嘢又未必，但佢次次乜嘢大制作都将最好嘅角色留畀「肥婆」，久而久之佢以为自己真系好掂。其实呢，「肥婆」样样都好普通，银色旅途行到今日咁嘅地步已经系好好彩。好多同佢出过门去做嘢嘅人都怕咗佢，因为「肥婆」唔知凭乜觉得自己系公主咁，乜都要人就住佢去，以佢为主。

有次遇到班睇佢唔顺眼嘅「男一」，个个都贱贱格格㗎，你好咪好啰，你扮晒嘢咪一齐玩你啰。「肥婆」又系唔知死咁玩黑面要人照顾，「男一」其中嘅「巴闭」全个旅程窒到「肥婆」飞起，仲唔觉意咁整甩佢个假发，等佢出丑人前。

「肥婆」癫咗咁大吵大闹，由于收咗钱做嘢，主人家都好唔高兴「肥婆」咁唔克制，最抵死之后佢唔再出现，搞到大家唔知点同畀钱嘅人交代。叫佢一齐去谂住帮吓「肥婆」嘅「大班」，终于睇清真面目，于是落闸斩缆，连佢都收手，「肥婆」真系处境堪虞，有排都无嘢做，但咁嘅性格无人缘自然无观众缘，提早收工都系时候。