星8卦｜「娇娇女」同「世家」离婚外父周围唱女婿「唔得」令人侧目

更新时间：11:00 2023-10-20 HKT
发布时间：11:00 2023-10-20 HKT

呢个世界真系有啲咁嘅老窦，成日叫个女离婚，离婚之后又猛咁唱前女婿，认真极品。「娇娇女」各种条件都不俗，加上有个「出名」老窦，都叫见过下世面。「出名」最唔想阿女同圈中人拍拖，但偏偏自己就系靠呢行揾食。

知道阿女同「才子」一齐，嫌男方有啲坏习惯，用尽方法捧打鸳鸯，「娇娇女」为呢件事同「出名」嘈咗几次大交，但最后都系基于一家人唔可以点样。之后同「世家」拍拖，「出名」唔再阻挠，因为同自己喺背后策划有关，两个人好快结婚，「出名」即刻送上厚礼，惊对方唔要自己个女。实情系贪人哋个门口大，想借「世家」老窦势力帮自己建立关系，揾更多嘅钱。

唔知点解两个后生仔结婚唔够半年就好似贴错门神，「出名」一定要阿女讲原因，原来系「世家」完全尽唔到老公嘅责任，只怪自己婚前无真系面对呢个问题，仲要成日俾两边父母催生仔，后嚟仲知道「世家」喺出面有妹妹仔，又唔似得同自己喺床上嘅表现，似乎问题喺自己身上，于是果断离婚。「出名」梗系唔想，但阿女坚持，无面之余惟有周围话前女婿喺床度唔得至要离婚，大家听到只有一个反应：「唔系啩，你咁缺德，点做长辈呀！」