星8卦｜「索姐」后生太烂滚「型佬」执着过去夫妻情渐淡

更新时间：11:30 2023-10-17 HKT
发布时间：11:30 2023-10-17 HKT

如果唔系一次嘴藐藐嘅表情，大家都唔知「型佬」同「索姐」之间嘅关系已经咁紧张。一直两个人嘅感情都系大家茶余饭后嘅话题。「索姐」后生又真系几放荡，随时同步有三至四个男朋友，收兵收到同期嘅女仔不知几羡慕又妒忌。佢最放唔低嘅系「坏仔」，两个人年龄、嗜好都好相近，「坏仔」最钟意试新嘢，𠮶阵兴乜都放上网，「索姐」同「坏仔」亲密关系完全无遮掩畀人知，但当时两个人名气无乜，所以引唔起话题。

后嚟「坏仔」飞起「索姐」令佢好无心机，求其系男人都拍吓拖，结果同「型佬」玩认真咗，仲大咗个肚，好多人都劝「型佬」唔好咁快决定，因为以佢仲好有潜质发展落去，负咗责任就要行人止步。「型佬」同「索姐」结婚后都好恩爱，因为有小朋友令佢哋觉得维系一头家嘅重要，但原来「型佬」一直有个心结，希望「索姐」可以交代一下当年同「坏仔」件事到底搞乜鬼，但「索姐」每次被老公问起都系沉默唔讲，或者当听唔到，最唔明「型佬」点解一直放唔低，一切都系以前嘅事，执着都系无谓。「型佬」开始喺出面拈花惹草，「索妻」心里有个底，所以无乜表态，但久而久之就觉得唔开心，夫妇俩感情亦系面和心不和。