星8卦｜「斯文」靠相睇嫁错郎主动离婚搞到情绪病

更新时间：11:00 2023-10-06 HKT
发布时间：11:00 2023-10-06 HKT

「斯文」份人其实好好，但衰在闷同埋无乜情趣。论家底都唔错，但一直唔想同圈中人，无咗同声同气靠相睇识到而家个老公，又真系有难处。最难搞系而家个老公太老正，对于「斯文」嘅行业真系唔多理解，见佢成日同唔同嘅男人合作，返到屋企就黑晒面，「斯文」解释又唔听，久而久之令到「斯文」觉得好大压力。另一个问题出现系「斯文」𠮶位巴渣奶奶，觉得自己个仔应该娶个更正嘅女人，而唔系娶个戏子啰。每逢有人嚟屋企食饭，一定要「斯文」喺屋企帮手，仲要做埋工人𠮶份，出出入入好鬼忙。

当有人赞「斯文」贤淑，奶奶就会讲埋啲唔三唔四嘅歪理，目的系要话畀人知呢个新抱唔系自己想要嘅，当初系个仔无谂清楚，又想成家至娶返嚟。而「斯文」听听埋埋梗系唔开心，所以出去叫公司畀多啲嘢做，咁连锁反应梗系老公唔钟意，加上阿妈唆摆，最绝系介绍朋友嘅世侄女畀阿仔识，话男人可以拣个再好嘅，结果喺「斯文」发现一家人都咁样对自己，终于死心，主动提出离婚，奶奶梗系好高兴，但老公就觉得无面，决定要拖住「斯文」，但自己又系咁识其他女人，处于呢种胶着状态，「斯文」情绪好差，开始要去睇心理医生自救。