星8卦｜「王子」用尽计谋扮病自保睇准时机专拣红人帮自己上位

更新时间：11:00 2023-07-21 HKT
发布时间：11:00 2023-07-21 HKT

「王子」近年走势凌厉，而且呃呃氹氹技巧惊人，不过好多明眼人都话佢上得快系有原因。好似早排病到死，「王子」全面休息，其实都系诈病，只因为佢份人好跟住潮流走，对网上走势好留意，全部都系话佢见钱开眼，密密割禾青唔认真，于是度桥自己停自己。最衰系之前老板都唔肯畀钱佢挥霍，「王子」用尽方法令到老板听晒佢嘅鬼话，但今次佢见势色唔对，就自己叫停，损失梗系有，但老板知佢揾到钱，就当无件事。

「王子」用心机帮自己都唔系第一次，成日将自己嘅利益计到最尽，然后扮真诚扮可怜将见多识广一样老谋深算嘅大老板都玩弄于掌股间，好似未系而家嘅地位时，佢第一时间就巴结「金蛋」，想当初日日埋身，早请安晚问好，「金蛋」将佢带喺身边真系帮咗唔少，但近年已经绝少见呢对孖公仔走埋一齐。

好多人问起「王子」做乜唔出现，「金蛋」了然在心，好淡然讲句：「我过咗气啦！」即系话要利用嘅价值已经用晒！今日「王子」以长辈身份埋咗「后起之秀」𠮶边，一来合时势，二来跟红顶白系佢专长，果然又帮佢收咗一班粉，你咪话佢唔叻呀！