星8卦｜「三寸」爆红忘本得罪人多亲自揾人拉关系被粗口问候

更新时间：11:00 2023-07-07 HKT
发布时间：11:00 2023-07-07 HKT

做人真系唔好太尽，因为你无法保证自己掂足四季。

最佳人办就莫过于「三寸」初时喺上面捞得好掂，就当出生地上上下下流嘅，畀晒面色，反晒白眼，一副我以后唔使靠你哋。点知死性不改，喺上面捞得好掂时一样成日做码头咕喱，得罪咗最大嘅电视台，一声令下封杀，大台有此举动，其他跟尾嘅自然有样学样，起码唔会搞错风向。

上面无位企，「三寸」死死地气返嚟揾食，为咗开演唱会攞靓期，一改之前大鼻唔识人嘅作风，周围约人食饭，搞笑在佢无助手，乜都亲力亲为，有次打电话畀一个之前都相熟嘅DJ，对方听到佢话自己系「三寸」，以为俾人整蛊，足足用咗15分钟闹佢神经病，当然唔少得粗口问候，DJ梗系唔好意思，但又点估到你三、五、七年唔揾人，竟然会自己打嚟拉关系啫！

为咗要人记得自己，「三寸」cheap到自己掏腰包买天王嘅演唱会飞，好高调咁俾人见到，拍埋片扮小粉丝，但听讲佢以前都唔系好睇得起人，今日咁样抽人水，又真系好唔要面。至于系咪可以收复呢边呢个失地，就祝佢好运嘞！