【头条独家】导演周冠威叹演员难求蔡思韵未敢谂金像提名

即时娱乐

更新时间：19:54 2020-01-22 HKT
发布时间：19:39 2020-01-22 HKT

电影《十年》导演周冠威最近在新作《幻爱》以精神病患者谈恋爱为主题，该片男、女主角刘俊谦和蔡思韵更凭电影刚夺得「香港电影评论学会」最佳男、女演员。电影源自导演06年拍的一套短片，资料搜集过程令他明白大众对精神病患者的不少误解，决定将故事拍成长片，但坦承揾女主角不易，直至遇到蔡思韵。对于外界睇好金像奖获提名，蔡思韵未敢想太多，认为若有提名是很大肯定。采访：杜淑霞摄影：李维隆发型：Lupuschui@orient4(蔡思韵) 化妆：ShuenKong@WiLLWong(蔡思韵) 场地：东南楼艺术酒店(蔡思韵)

周冠威为短片资料搜集时，社工转介了不少个案令他好难忘，触发他写今次故事，「个少女系精神分裂症病人，佢好钟意弹钢琴，但幻觉每次放对手喺琴键就有人用刀𠝹佢，我就问佢『咁唔合逻辑嘅嘢都信？』佢话呢个就系病。而另一个康复者，佢结咗婚生埋仔，我又打个突，佢都可以结婚生仔？虽然系个愚蠢嘅问题，当时自己确实系无知。但佢嘅另一半系点？佢几时同人讲有呢个病？每一个佢哋嘅爱情故事都有呢个关卡，好似电影嘅宣传语句『你介唔介意呀？』佢哋嘅爱唔系一般，会多啲付出同接纳。」

望年青演员出头
虽然周冠威写了剧本多时，但一直未开拍原来因揾唔到女主角，「讲真2006年有第一稿剧本，到依家先拍，除咗创作同资金上困难外，系未揾到女主角，（06年时思韵仲好细？）上天安排我等紧佢长大，哈哈！」对于外界睇好获金像提名，思韵未敢想太多，「作为第一套香港电影，我的确遇到好有发挥角色，只谂做好，冇谂过透过咁攞奖，如果咁幸运有提名会好感恩，系个好好肯定，但唔敢谂太多。」不过周冠威好希望思韵跟刘俊谦有好成绩，「讲得夸张啲，对个巿场都系有需要，呢个香港巿场需要明星，需要年青嘅男女演员，导演几好都好，但观众睇嘅都系演员。」