港闻

娱乐

最Hit

即时

中国

国际

星岛申诉王

财经

地产

生活

健康

教育

体育

大湾区

专栏

马经

PLUS

【头条独家】过料新导演千祈咪盲目听人意见张家辉自爆恨演冷门题材

即时娱乐

更新时间：17:33 2019-10-29 HKT
发布时间：21:00 2019-10-28 HKT

家辉话向来对角色冇框框，白痴、邋遢乜都得，最重视是好剧本。

张家辉最近首度跟三位新导演黎兆钧、刘永泰和施柏林合作电影《催眠•裁决》，曾经执导过三套戏的家辉，好明白做新导演的困难，三位导演大爆拍摄时家辉经常以过来人身份提点他们不要盲目接受意见，家辉亦自爆个人好理智又有原则，无论做导演定演员会好开明去接受人意见，但同时又唔会挂住听人讲自乱阵脚。不过家辉话暂时未有再做导演计划，仲话好享受做演员身份，更讲明好恨拍啲冷门题材，白痴、邋遢乜都得，仲叫三个新导演可以度啲新嘢再合作，睇嚟大家想睇家辉执导要再等吓啦！撰文：杜淑霞摄影：李维隆发型：Edmond fung @HH.hair化妆：Midco Chu场地：港威酒店

跟三位导演一到场，家辉就自称今次是公关身份，向传媒介意三位新导演，但又搞笑谓到现在都未分到导演的名字，令大家哭笑不得。

三位导演10多年前已合作开制作公司，自然特别有默契，家辉大赞他们在现场分工做得好，（左起）黎兆钧负责跟演员沟通；刘永泰主要负责机器；施柏林则宏观睇整体画面。

家辉在戏中饰演大学心理学教授兼催眠师「许立生」，成为杀人案陪审团之一，但被要胁下试图利用催眠术操控审判结果。家辉直言最初接受三位导演邀请时，只因看了剧本觉得他们平衡得好，「最初我都担心催眠呢个题材会闷，但系睇咗剧本平衡得好好，文戏同动作五五波，咁样对cut出嚟个故事会好紧张。」三位导演亦坦承，希望今次能凭文戏令家辉答应演出，黎兆钧说：「最初谂家辉哥近10年都系演动作戏为主，今次演大学教授、催眠师，专注文戏可能会对佢会有多啲新鲜感。」

怕自我陶醉型导演
不过，家辉坦承唔使打并唔系最重要接拍主因，「我好怕啲导演自我陶醉，其实冇问题，有个性嘛！但系电影系个商业行为，唔可以斋讲个性，但系冇个性又唔得㖞！我睇到佢哋今次嘅平衡，好有分寸，所以好安心合作。」另外，家辉亦好欣赏三位导演的事前准备功夫做得好足，「可能佢哋有三个人，仲会互相踢，提出好多问题，所以我可以轻松好多，只要埋位去做就得。」

家辉近年演的角色好多时都是智慧型，好似今次的催眠师，但他反而认为对角色从来冇框框，「我反而冇所谓，智慧又得，做啲白痴、基层嘢都得，我又唔怕邋遢，一定要好豪华咁，最紧要有诚意嘅剧本，希望可以试吓啲冷门嘢。」

作为陪审团当然希望可彰显公义，但在被要胁的情况下「许立生」应该如何抉择呢？

未有计划再执导演筒
三位导演又大赞家辉以新导演过来人身份，经常提点他们，施柏林说：「佢成日提住我哋会有好多人畀好多意见，但系要做番自己，唔系就会乱咗章法。」家辉再补充，「有好多人会畀好点子，原意系好嘅，但系盲目跟住做未必演绎得好，仲可能搞到本身自己想做嘅嘢做唔好，我不嬲都系咁嘅人，做演员都系咁，用开明态度去听，但系唔会为咗谦虚去接受所有意见。」

谈到何时再有导演新作，家辉就强调自己是个理智的人，唔会为做而做，「唔系每样嘢谂到就要做，无谓迫自己，到有个好故事、角色，砌到剧本先再讲，同埋我好享受做演员。当然唔系伟大到要帮新导演诞生，但系佢哋真系会畀到啲新冲击，讲真浸咗咁耐好多嘢会生咗茧。」三位导演又踢爆家辉已答应演出他们下套作品，家辉即解释：「佢哋咁有分寸，又有热诚，仲想点呀！符合到都难啦！佢哋冇新导演嘅框框，搞社会性题材又会谂商业嘢。」不过问到下套会拍甚么题材，家辉即鬼马大卖关子，「到时睇嘢啦！」