【头条独家】《神奇小子》残障短跑运动员胡子彤望拍拳拳到肉动作戏

更新时间：20:51 2021-08-12 HKT
发布时间：20:45 2021-08-12 HKT

子彤在《妈妈的神奇小子》饰演残障短跑运动员「火车东」。

胡子彤最近在电影《妈妈的神奇小子》饰演残障短跑运动员，拍摄时似足运动员日日狂跑，为保持状态饭都唔敢食，因为怕会跑到呕。子彤由出道开始经常参与运动题材电影，他不但唔厌仲好开心可以累积经验，未来更想尝试做滑板运动员，或者拍套拳拳到肉动作戏，更想下年30岁前认真打场拳成就解锁。撰文：杜淑霞摄影：张咏森发型：Lupus@orient4 化妆：Bonbon@MOD Makeup Academy 服装：Diesel

戏中残障短跑运动员代表香港去参加奥运会，「火车东」是成员之一。

子彤近年爱上打泰拳，更想下年30岁前认真打场拳成就解锁。

子彤今次角色「火车东」好容易发脾气，情绪波动好大，仲要一嬲就会有痉挛状况，不过他反而觉得要应付跑步戏更困难，因为每日跑8、9个钟，但只拍几分钟戏，「都好甘㗎！食饭唔敢食好多嘢，阿聪（张继聪）笑我哋食多啲有得呕，其实真系惊会呕，同埋都跑到冇晒胃口，只敢食菜、肉同饭每样少少，keep住力量顶到就算，跑多几次真系会想呕，宁愿拍完之后𠮶餐食好啲。」

子彤跟谢霆锋合作的电影《怒火》，动作戏以揸枪为主。

早前子彤参与电影《二次人生》，戏中饰演业余长跑运动员。

30岁前成就解锁

子彤由出道作《点五步》开始参与过不少跟运动有关角色，不过他坦言有机会仍然想拍这些题材，「有人问我惊唔惊定型，只系做到运动员角色，我绝对唔会咁谂，呢个系我优势，能力范围内我梗系做尽啦！运动类型电影可以畀唔同层次嘅胡子彤大家睇，好似上次《二次人生》讲运动得嚟见到木独嘅胡子彤，今次就系情绪爆炸嘅胡子彤，趁我仲系做到运动嘅年纪，绝对系一个好好嘅磨练机会，去累积多啲唔同嘅演出经验。」

如果有机会子彤仲想多拍动作电影，不论专登去学滑板，还是拳拳到手的打戏一样无问题，「啱啱睇奥运滑板真系超好睇，好劲！真系冇分年龄，10几岁至30几岁运动员都有，畀到时间我练我有信心做到嘅，但预咗一定断手断脚。但系演员好玩，就系试到非一般人试到嘅嘢，为咗个角色去学一样嘢变到精，我觉得几满足几爽皮㗎！我仲想试吓拍套拳拳到肉嘅戏，我𠵱家都学紧泰拳，
迟啲有时间我都好想打一次馆内赛，下年30岁前希望可以达成呢个目标。」