【头条独家】发梦同杨千嬅合唱重燃内心团火赵浚承靠肌肉恶斗乐坛「小鲜肉」

更新时间：23:01 2021-06-29 HKT
发布时间：03:00 2021-06-30 HKT

赵浚承有机会重返乐坛圆歌星梦，他强调一定会更加珍惜。

环球唱片用咗两年时间成功捧起陈凯咏(Jace)、涂毓麟(Oscar)及乐队ONE PROMISE，今年再力推4组新人赵浚承(Gary)、曾比特、P1X3L及石山街。其中以34岁「老新人」赵浚承最有故事性。Gary是前4人男子组合Square成员，跟参加过TVB《冲上云霄大选》嘅机师李柏焕(Brian)系旧队友，Gary迷失10年，𠵱家重新出发。采访：方骞平

新歌《My World》MV中，有幕抱住陈欣妍英雄救美，点知被陈欣妍「投诉」他手震。

4人男子组合Square于2008年成军，只维持两年就解散。

环球唱片好睇重赵浚承，加盟冇耐就推出新歌《My World》，由大师级人马舒文做监制兼填词，另外又揾嚟陈欣妍（Shirley）任MV女主角，安排他抱起「女神」，有英雄救美场口。

34岁「老新人」
讲番崎岖际遇，他坦言当年由模特儿转做歌手发展唔顺利，最后决定解散，虽然落寞离开，但兄弟情还在：「冇得玩初期我都唔死心，会keep住作歌再掟啲demo去公司睇吓有冇机会单飞，最后采取回避态度，唔再听歌，甚至唔再去唱K，完全抽身做地产，帮叔叔公司出售名表维生。直至两年后发梦同杨千嬅合唱，醒番时崩溃爆喊，其实杨千嬅唔识我，个梦只系牵动到我情绪，知道自己根本系放唔低歌手。」Gary于15年获内地导演赏识，并于《星光大道》比赛夺得季军。「加强咗自己信心，后来同环球董事总经理黄剑涛（Duncan）结缘。哈！可能佢欣赏我嘅恒心啩，咁多年嚟竟然仲有团火，所以再畀机会我！」

(左起)George@P1X3L、Phoebus@P1X3L、Gin Lee、Marstn@石山街、曾比特(Mike)及Gary系环球唱片新一代猛将。

赵浚承自爆天生6块腹肌，不过都要勤于Keep住好身形。

问到34岁嘅Gary点跟乐坛一众「小鲜肉」恶斗？他大笑说：「咪赢个脑，赢自己年纪大，胜在有少少经验啰，经验之谈明白到有啲嘢系控制唔到嘅，所以做好每件事，Enjoy就得喇，最紧要系随缘同埋珍惜。不过我算几好彩，咁啱重返乐坛，TVB开绿灯可以上音乐节目，多咗个平台嚟做宣传。」除此之外，Gary仲会努力操肌，用6块腹肌展示男人魅力嚟吸粉，笑言不论男、女，甚至「挛嘅」都唔拘！