【头条独家】唔想将秘密带入棺材洪朝丰爆跟宝咏琴委屈旧恋事

更新时间：15:32 2020-03-05 HKT
发布时间：21:00 2020-03-04 HKT

虽然同宝咏琴嘅往事令他身败名裂，但洪朝丰冇后悔，更多谢宝咏琴令他变得坚强，就算喺人生路上再跌倒，都爬得返起身。

今年1月5日「登六」的洪朝丰，形容60岁大晒，在社交平台宣布「出柜」！99年跟已离世17年的香港富婆宝咏琴高调相恋3年(中间曾分开及复合)，曾结过婚有儿子，跟5个男仔拍过拖的洪朝丰由双性恋变同性恋，坦承曾经苍海，尤其被宝咏琴伤害最深。经过21年沉淀，丰丰冷静地将埋藏在心底多年的秘闻揭开，「佢(宝咏琴)只畀过4000蚊现金我『责袋』，我同佢一齐唔系贪佢钱。」采访：方骞平

2003年宝咏琴出殡时，丰丰神色凝重去灵堂致祭，因为宝咏琴临终前半年已向他道歉，他经已原谅咗对方。

洪朝丰曾大病过3次，形容呢20几年嚟过得好辛苦，有好大压力。

经历过抑郁狂躁症、舌癌及淋巴癌，洪朝丰话自己死过翻生，唔想将守住20年的秘密带入棺材，对宝咏琴生前公开指控他，话他系同性恋者，为咗钱埋她身，洪朝丰委屈地有嘢讲：「𠮶3年嚟，我撇咗宝咏琴两次，又唔见啲人赞我有骨气？梗系话我为咗贪佢钱同佢一齐，而且焦点永远落喺我有精神病时，指骂宝咏琴『一只手指捽死你』、要求提供100万元性服务费！最唔公平系，男人同女人嗌交，永远系男人唔啱，有钱同穷人吵架，又系穷人做错。」

宝咏琴曾道歉

讲到钱，丰丰好敏感并强调同宝咏琴第一次分手时，系赚紧200万年薪，「直至2000年3月宝咏琴要求复合，虽然𠮶段日子我生意失败冇晒收入，佢只系畀过4000蚊我『责袋』，我亦冇佢附属咭，当时食佢住佢，佢有时买靓衫畀我，出钱同我去旅行，根本连4000蚊都使唔到。第2次分手后一年，宝咏琴终于肯对我讲：『对唔住！』我亦原谅咗佢，喺宝咏琴最后岁月，我不时喺医院同佢倾心事，但我只系得到佢司机送嚟嘅靓羊扒，因为佢知我钟意食羊，直至佢离世，我屋企个雪柜入面仲有一块靓羊扒，我珍而重之唔舍得食。」

2017年10月，丰丰分别确诊患上舌癌及淋巴癌，要割舌保命，因而失去咗一把靓声。

一拖二去旅行
洪朝丰又自爆：「第一次我喺邮轮提出分手，佢要胁我话『回港开记者会，到时讲畀记者听，你系Gay！』佢想用同性恋者嚟要胁我，摧毁我事业同形象，呢场战争系由佢发动攻势在先，只系大家见唔到。」丰丰表示自己系潮州怒汉只怕父母，所以必定同佢死过，反正自己系烂泥。「我从冇呃过佢，由始至终，同佢交往前我表明另有男朋友，佢系接受我哋三人关系，我哋三人仲一齐去过上海、杭州、苏州、北京、西安，我哋三个会互相关心，佢两个都好爱我。」问他可会提供三人行相片作证？洪朝丰却一口婉拒：「唔信就算，我要保护我前男友。」

「喺呢件事上，反而佢前夫刘銮雄就睇得穿，当年佢公开力挺我话：『阿琴做人唔好咁毒，洪朝丰系好人嚟嘅。』当时大家未必参透当中玄机，但以我理解，刘銮雄系睇得出宝咏琴想将我置诸死地，所以提出呢个忠告，虽然我唔识刘銮雄，但咁多年之后，仍然好多谢当日刘銮雄出手。宝咏琴会『爱之欲其生，恶之欲其死』，不念恩情，无情无义，佢根本唔识爱人。」

不甘心被支配

问到关系如此差，点解会复合？丰丰解释：「第2次复合由宝咏琴要求，佢话好挂住我，惊我冻亲，要攞啲棉被落嚟我舖头畀我，我一时间受感动，唯一开出复合条件，唔可以好似以前咁有正常嘅性关系，因为我对住佢唔能够再完全放松。当时佢话：『唔紧要，我哋揽吓锡吓就可以。』可惜复合年半再喺纽约旅行期间分手，因为我哋性格有差异，佢唔只要求十全十美，仲要支配住一个人，仲屈我狂躁症病发，要求我加药。」