政府烧烤场重开｜严选20个靓景方便隐蔽BBQ场呢几个最就脚、大量炉位

更新时间：23:24 2022-10-28 HKT
发布时间：23:24 2022-10-28 HKT

政府刚刚宣布政府辖下烧烤场于下周起 (11月3日) 重开，等了将近3年的香港人，终于可以好好享受BBQ，明正言顺去郊外舒展，想起可以一班朋友齐齐「烧鸡翼，我最钟意食」就兴奋。久违郊野BBQ，就即为大家搜罗全港各大由政府管理的烧烤场，原来BBQ场有两种：渔护署场地及康文署场地，原来渔护署场地位于郊野公园，而位于沙滩旁的就由康文署管辖，两种BBQ场总数多达二百个，即刻跟大家严选20个热门烧烤场看看哪个最值得去！

严选20个热门烧烤场

靓景推介︰

大美督烧烤区
用家意见：「呢个算唔算烧烤场始祖？就算唔系最耐都一定系最多人联想得到嘅好地，有海景有得泊车又有得租单车，冇得输。」
美景指数︰*****
烧烤炉数目︰大量
方便程度︰*****
总分︰*****

（资料图片）

大网仔烧烤区
用家意见：「坐西贡巴士经过大网仔一带，成日都见到好多靓景烧烤炉，大部分都系望海，连只鸡翼都会特别好食，点可以唔打卡。」
美景指数︰*****
烧烤炉数目︰沿途有多号场地，中量
方便程度︰*****
总分︰*****

石澳泳滩烧烤区
用家意见：「夏天好多人去游水嘅石澳滩，有小巴、巴士仲有得泊车，而且又系海景，洗手间设置齐，最紧要系冬天相对少咗人，最啱烧烤。」
风景︰*****
烧烤炉数目︰中至少量
方便程度︰*****
总分︰*****

清水湾第一湾泳滩烧烤场
用家意见：「清水湾第二滩有车位，或者坐巴士去又得，不过烧烤就要行返去一号滩，但相对而言人潮就冇咁多，几舒服。沙滩烧嘢食听住海浪声，心情特别好。」
风景︰*****
烧烤炉数目︰中至少量
方便程度︰****
总分︰****

南湾泳滩烧烤场
用家意见：「南湾系一个风景优美嘅泳滩，最紧要系冇浅水湾同赤柱咁多人，识游一定系拣南湾。所以烧烤场一样系比较少人用，烧烤炉19个，应该唔会太多人争。」
风景︰*****
烧烤炉数目︰中至少量
方便程度︰***
总分︰****

大棠烧烤区
用家意见：「红叶季节就快到，有咩好得过系去完BBQ又可以行埋山睇红叶先，不过要留意一件事，红叶季节期间，大棠山道有半条都会封路，事情就唔会两全其美，至于非红叶季节嘅话，部车就可以泊上烧烤区附近，行去BBQ场一分钟都唔使。」
风景︰*****
烧烤炉数目︰中量
方便程度︰****
总分︰*****

交通方便推介︰

黄石烧烤区
用家意见：「一程巴士94或者96R坐到尾站，虽然大家会觉得好似有啲远，但系……真系好靓，又真系算方便，其实预咗BBQ都去玩一日，点解唔拣呢个场呢？」
风景︰*****
烧烤炉数目︰大量
方便程度︰*****
总分︰*****

北潭涌烧烤区
用家意见：「北潭涌亦是另一个有巴士、小巴、泊位嘅场地，而且真系有大量烧烤炉，入闸之后的伤建乐园烧烤场也是可选择的场地，而呢一带总数系有六个有编号的场，所以只要肯入去，基本上都唔难揾炉。」
风景︰***
烧烤炉数目︰大量
方便程度︰*****
总分︰****

（资料图片）

鹤薮烧烤区
用家意见：「由粉岭坐小巴直入就会到达鹤薮水塘附近，烧烤场全部在马路旁边，唔用「直达」呢两个字真系讲唔通。」
风景︰***
烧烤炉数目︰中至大量
方便程度︰****
总分︰****

驾车人士推介︰

涌背烧烤区
用家意见：「系，有车真系大晒㗎，因为你去到一啲其他人要好转拆先到达嘅烧烤场，当中在新娘潭路边嘅涌背烧烤场及营地，好多发烧友钟意开车去，由于其他的交通工具比较难到达，班次又唔多，所以就转咗系自驾人士的烧烤乐园。」
风景︰***
烧烤炉数目︰中量
方便程度︰***** (开车计)
总分︰****

大坑墩烧烤区
用家意见：「大坑墩烧烤区系香港最热门的放风筝地点，即系大坳门所在地，个草坡靓到爆，而一般人要去系好麻烦，落巴士或小巴后要沿清水湾道行入去，但开车的话就可以直接泊入去，不过要留意，车位好少，要争嘅!!!」
风景︰*****
烧烤炉数目︰中量
方便程度︰***** (开车计)
总分︰*****

城门烧烤区

用家意见：「城门水塘烧烤区亦好似系专程方便自驾人士而设咁，因为唔开车去的话，从小巴站真系要行上斜路再入去，当然，有好多行山人士唔介意，但BBQ要攞住咁重嘅美食就最好开车吧。」
风景︰****
烧烤炉数目︰中至大量
方便程度︰**** (开车计)
总分︰****