胡慧冲 - 泰国四面神竟脚踩南瓜？ | 笔泰冲动

更新时间：02:00 2026-11-06 HKT
发布时间：02:00 2026-11-06 HKT

　　非常多谢泰国政府旅游局邀请，日前有机会去到曼谷以北嘅Sing Buri（信武里府），参加当地一年一度四面神祭典，真系令我大开眼界！

　　当晚场面十分壮观，除咗宗教仪式，仲有大型歌舞、精彩舞台剧同烟花表演，现场气氛非常热闹！而最吸引我嘅，当然系当地呢尊据称全球最大嘅金属铸造四面神像！不过大家有冇发现，呢尊四面神同其他唔同，竟然系脚踩南瓜！

　　相传四面神降临人间时，神力强大，双脚不能直接接触大地，因此有脚踏植物果实嘅传说。但原来背后仲有更实际嘅意义！呢尊神像由当地高僧龙婆Charan兴建，希望透过南瓜，突出信武里府嘅农业特色。事源当地盛产南瓜，以前农民卖畀收购商，每公斤只得约6泰铢；后来透过神殿直接卖畀游客，价格可以提高至18至20泰铢，因而帮助农民增加收入。

　　而南瓜泰文叫「Fak Thong」，当中「Thong」即系黄金，寓意财富同好运。最有意思嘅系，大家可以直接喺神殿附近摊档购买南瓜拜四面神，拜完之后将南瓜带返屋企煮嚟食，寓意将福气同财运带返屋企！

　　如果唔想带走，亦可以将南瓜留喺原地，当地会安排转赠畀有需要人士，包括用作学生午餐食材，真正做到拜神祈福之余，又可以帮助农民同有需要嘅人，一举两得！当地亦鼓励学生参与清洁神殿等社区服务，培养责任感。

　　一个南瓜，竟然将宗教信仰、农业经济、慈善同教育连系起来！呢种有意义嘅地方文化，真系值得大家认识。如果你有兴趣亲身参观，由曼谷出发最方便就系包车，车程大约两个钟，视乎交通情况而定。值得安排半日甚至一日时间，感受一下曼谷以外嘅泰国风情！

胡慧冲