收银员拒收贴胶纸「受伤」50蚊顾客贴图公审反遭网民围攻按入去睇处理烂银纸官方说法｜Juicy叮

更新时间：15:46 2025-06-20 HKT
发布时间：15:46 2025-06-20 HKT

有收银员拒收贴有胶纸的「受伤」50蚊纸后，遭顾客贴图在网上公审，但有关顾客却围炉失败，反遭网民围攻狂轰，有人不客气地开火：「有问题的是你！出帖博围炉！你自己都知张银纸有问题啦！迫人收！」、「你去买嘢都系想用咗张烂银纸啫，人哋唔收你就发脾气」、「首先问自己，如果张银纸有问题嘅话，你本人收唔收啊」。（下文另附处理烂银纸的金管局官方说法）详情见下图及下文：

收银员拒收贴胶纸「受伤」50蚊顾客贴图公审反遭网民围攻逐张睇↓↓↓↓

楼主发文公审

楼主早前投稿facebook群组「西店Hi客之道」，帖文以「50蚊纸有咩错」为题，力数金毛收银员的不是：

「买嘢𠮶阵时俾50蚊纸找数点知店员好串咁话唔收。
我：吓，点解唔收？
金毛仔收银：你用胶纸贴过我哋系唔会收嘅。
我：呢张又唔系假银纸，你拎去照下咪知系咪真啰。
金毛仔收银：总之唔收，你俾过第二张我。

咁我咪唯有唔买啰，真系唔知原来而家啲收银权力大到有权拣钱嚟收，所以唔好话冇生意，一切都系自己做成，请埋呢啲冇家教嘅𡃁仔又唔做培训，净系识得赶客，想人留喺香港都难啦」。

网民几乎无一撑楼主

醒目的网民看过公审帖文的内容后，几乎无一撑楼主。楼主如今围炉失败反遭网民群起围攻，较温和的网民跟楼主讲道，并教路到发钞银行更换：

•交俾银行有得搞；
•攞返去渣打有无得救；
•崩咗只角都有权唔收㗎；
•做收银都要同老细交代㗎；
•收银冇问题！你自己反思下啦；
•乖，损耗嘅货币，得银行可以收的，亲；
•人哋真系可以唔收，有损毁嘅货币应该自己去银行换；
•无知不是罪，人蠢冇药医，仲要摆上网，架就攞嚟丢；
•可以拎返去，发钞银行会做鉴定，之后Ok可以换返张；
•佢就系唔知几时收咗，觉得自己Ｘ咗，唯有尽快掉出街；
•首先问自己，如果张银纸有问题嘅话，你本人收唔收啊；
•究竟系时代变迁定啲人智商退化，乜Ｘ都以为可以公审；
•自己冇认知怪人哋唔收！损坏咗嘅货币要攞返去发钞银行回收。

另有处事严肃的网民，更加不客气地对楼主破口大骂：

•唔系话香港服务业有几好，但系有阵时遇著呢啲自以为是，又死要面㗎西客都真系几惨！

•有问题的是你！出帖博围炉！你自己都知张银纸有问题啦！迫人收！你真系衰格到冇人有！

•好简单，收咗唔用得老细叫还钱，你会赔吗？系个人都唔想赔，所以直接唔收。我最多讲句去银行换返佢；

•烂咗做咩要收呀，唔好买啰。买50蚊嘢以为自己好大支嘢，你去买嘢都系想用咗张烂银纸啫，人哋唔收你就发脾气；

•其他钱唔肯俾或者喺八达通等等，你全身得𠮶50蚊？如果唔系嘅话摆就明玩嘢啦！你将有问题嘅货币俾人，人哋打份工你想跣人一镬；

•店舖有权唔收，你可以拿回发钞银行换回一张正常钞票，呢个系常识，只不过系你自己懒，唔想去排队换，店舖亦无义务因为你懒而帮你做工作以外的事情；

•其实张钱有问题，系有权唔收，理应自己拎番去银行更换，我试过有个客俾张过完洗衣机嘅钱我，变晒形，唔好意思真系唔收，呢个位职员系有负任帮公司把关唔收有损坏嘅钱币；

•香港实在太多你呢种自以为是嘅傻Ｘ，莫讲你胶纸贴住，就算你银纸崩咗个角商户都有权拒收要你提供其他纸币。不过有啲收银厌麻烦／无睇清楚照收咁解唧。咁都要摆上网，好在啲人都系插Ｘ你，证明香港都仲好多正常人。

另有网民分享自己的经验：

•系可以唔收，所以啲店找钱时要睇清楚，上次有间店又系俾咗烂嘅，搞到我要去银行换。

•一定唔收啦，仲要晒时间去银行排队换过张。试过有次有个Mk（旺角）仔俾张冇咗3分1嘅钱我，我唔收，佢话唔买，之后隔咗5分钟有第二个女仔嚟俾同一张我，仲要折埋咗，我见到即刻话唔好意思，我已经同上一个男仔讲咗我哋公司唔俾收烂银纸，唔使再试啦，最后佢劲尴尬咁行走咗（后面排晒队）。

钞票损毁点算好金管局咁讲↓↓↓↓

在回应栏上，不少网民给楼主教路，指银纸破损可以到银行更换。就遇上钞票被涂污或损毁情况，金管局之前则教落市民应该咁做↓↓↓↓

在金管局facbook，局方之前曾以「烂银纸都系钱？」为题发帖，指出「如果银纸崩咗角、污漕咗，有轻微破损系可以继续用，但最好拎返发钞银行，当银行验证咗系真钞、损毁面积冇超过四分一、防伪特征完整，一般都会换返钱畀市民嘅」。而在金管局网站的「常见问题——纸币和硬币」部分，官方就这问题作解释——「被涂污或破损的钞票能否被银行接受及兑回钞票原值？」，指：

「一般而言，纸币上如有涂污或损毁情况，可能会出现其他市民或商户不愿接纳的情况，所以钞票持有人应尽量保持钞票完好，以保障自身利益。

如遇到涂污或损毁情况，市民可向有关发钞银行要求兑换。发钞银行会根据既定的准则来验证真钞，例如涂污或损毁程度、防伪特征是否完整，决定可否兑回原值，由于每张钞票的涂污或损毁情况会有不同，银行会个别考虑」。

金管局并在网页的「纸币冷知识」栏目下，设生动的情景题解画：

阿四：小森，头先食饭每人夹88蚊，你仲未畀返我！

小森：你睇下啦，我银包得返一张「红衫鱼」，上面仲崩咗一个角，唔畀得你。

阿四：银纸烂咗都系钱，点解唔畀得我？

小森：你有所不知，损坏咗嘅纸币系有可能唔被接受做法定货币㗎。

阿四：如果唔觉意收到张霉霉烂烂嘅银纸，咁点算好？

小森：崩咗角、污漕咗嘅银纸仍然用得㗎，但如果你觉得唔顺眼，最好都系拎返发钞银行回收。一般嚟讲，银行会验证张银纸系咪真钞、损毁面积有冇超过1/4、防伪特征系咪完整，无以上问题就可以兑返钱。

资料来源：西店Hi客之道＠facebook

时光倒流。2024年10分，有小巴乘客竟然使用有几十年历史的货币作车资，被小巴公司图文并茂贴告示，以因一原因为由表明拒收。识货的网民则争相留言指旧货币「值钱」，用来搭车好比倒钱落海。

对于有人豪掷大推5仙银仔（俗称「斗零」）搭车，网民恨得牙痒痒，扬言「好想要」，甚至要「大量收购」，有人妻更加留言称「我99（奶奶）前排话，她朋友讲一个5仙值$2000」。而在两三年前，更有收藏专家指1964年的5仙市面炒价高达2万元起↓↓↓↓