借钱党新招杀入屯门 自称我来自巴西 骗徒靠一表现呃走港女$600｜Juicy叮
发布时间：12:44 2025-04-17 HKT
「借钱党」又有新招。一名怀疑骗子早前在屯门西铁站附近自称「我来自巴西」但「提款卡攞唔到钱」，因为一个表现，在街头成功向一名好心港女借得600元。女事主事后坦言「有少少怯，觉得可能中咗伏」。
回应的网民大多认为不是「可能中伏」，而是经已「中伏」，安慰楼主当买六合彩做善事、破财挡灾之余，还教应对方法；有人更顺便自爆遇上怀疑骗徒的经历警世。
facebook群组「屯门友」版主早前代街坊发帖，讲述事发经过，详情见下图及下文：
借钱党新招杀入屯门逐张睇↓↓↓↓
女事主：见佢好诚恳就信咗佢
女事主指：「头先喺屯门西铁站，有个大陆操北方口音嘅中年男人声称自己提款卡攞唔到钱，仲亲身去花旗提款机示范俾我睇。佢话自己喺巴西嚟香港做生意，唔系迫不得已都唔会问我一个女仔借钱。我见佢好诚恳就信咗佢，话听日中午佢朋友就会过返数俾我。但而家有少少怯，觉得可能中咗伏。我借咗600俾佢食饭+住酒店」。
回应的网民心水清地指「咁都信」、「耳仔咁软？」、「应该冻过水了」、「$600买个知识」、「当破财挡灾啦！」、「原来真系会有人信」、「桥唔怕旧最紧要有人受」、「财到光棍手，一去无回头」。
网民接著好心教路「我会打999帮佢」、「一见到即刻掉头走啦，佢再讲即刻话报警或者同佢去警署」、「俾著我听到借钱即时失聪乜都听唔到！一定叫佢报警求助！」。有数口精的网民补充「啲钱咁易赚」、「一个$600，十个就$6000，密食当三番啰！」、「一日揾够两三个，就有$2000袋入袋。遇到呢啲正路带埋去差馆揾警察叔叔帮佢手啊」。
有冷眼旁观的网民则好奇「有结果通知声」、「留言睇结果」、「留名睇后续」。由于楼主因为对方「好诚恳就信咗佢」，于是有人更笑言「个阿叔肯定好靓仔……」、「佢一定好靓仔……如果唔系你应该唔会中伏」、「你是否单身？是否对方好靓仔？你是否希望好像童话一样千里姻缘一线牵？否则我想不明白有乜嘢理由会信？可能是我肤浅吧！」。
相关阅读：当街拉址男途人搭讪 红磡马尾女又摸又扫 一散水举动令人咋舌
借钱党新招杀入屯门逐张睇↓↓↓↓
网民分析疑点教路应对：
•一见到即刻掉头走啦，佢再讲即刻话报警或者同佢去警署。
•唔好谂无真相嘅嘢，你出于好心帮人就已经收福，真系有心呃你嘅人亦会有恶报。
•应该伏咗了，当破财挡灾啦，你出于好心系善良，但以后要小心，骗子多的是，一句赶时间走人，别和对方交流。
•和尚都可以假，何况是普通人？别太好心肠！若有人话无$，无论系详原因，香港人嘅就叫佢揾社工，外国人嘅就叫佢揾警察。
•你依家唯有谂：佢系大陆富二代或者富三代，听日兑现承诺。再俾惊喜你，等你听日一朝暴富。咁样谂你今晚应该瞓得著，人要正能量嘛。
•你当买咗$600六合彩做咗件善事就算啦，当自己帮咗人唔好当自己俾人呃，咁会开心啲，预咗无先，如果听日真系还到俾你，咁更加应该去买注六合彩了。
•伏气好大，但如果你𠮶刻信人就先预咗自己可能会俾人呃，但既然做咗，咪当一个教训，或者人哋听日真系俾番钱你呢，我上次都帮咗个人，但金额好细遮，虽然真系无回头，但做咗觉得自己好似做咗好事咁就ok啦，人总有好人坏人，未必过过坏嘅，人哋问你过到自己就ok啦。
•好多疑点呀！一个人冇钱又点可以来到香港又深入屯门呢种居民区？佢一个朋友都冇？中国人冇银联又冇电子支付，外国人又冇信用卡（系真都俾入境处卡在系机场）？所以下次要就帮佢带路去差馆，保证吃喝不愁，仲有翻译，分分钟仲有免费机票返回原国，好过你帮佢个$600之后佢仲要烦点样还俾你。
相关阅读：「伸手党」中央图书馆外揾食 3女邀「坐车去XX」 DSE考生出杀手锏了断
网民自爆遇怀疑骗徒经历：
•10几年前我已遇过呢类拆白党，当时我话带佢去揾警察，佢就闪开咗。
•当年新发邨未拆，已经有人响河边咁样问我，我著住校服，梗系冇钱俾佢啦，估唔到而家仲有。
•上个月夜晚喺石排德雅工业中心楼下，有个西装普通话排骨地中海同个女人，佢够话上海嚟倾生意，又话个支付宝用唔到，叫我俾钱佢食饭，我一句得埋去「唔识听你讲乜」就走咗。
•今日都有一对大陆口音男女系新墟屯门诊所对出用同一招对我，叫我俾钱或支付宝佢食饭，我即时同佢讲，你喺对面马路卖咗部电话咪有钱啰！即时唔出声走咗去。
另有网民精明地想出计中计，估计「听日真系还$600俾你，要多谢你请你食饭赞你好好人，但佢外国有单货未找数叫你再借8万！」、「放心啦！见妳咁好人，可能会还俾妳，佢话系「生意人」大家交个朋友，迟啲再借6万、60万……」。
相关阅读：港女皇岗口岸疑遇迷晕党 三度碰面企到好埋 一除口罩由头晕到尾↓↓↓↓
有港女早前在皇岗口岸疑遇迷晕党，她三度碰到一名男子「企到好埋」，向她借WIFI，不断向她问问题，女事主觉不对劲「调头走」，上到车一除口罩，即「由头晕到尾，差啲倒地」。女事主表示：「如果我唔系戴咗口罩，同有啲警觉调头走，应该畀人揽咗上车。」以下为事发详情：
