认购银债睇住嚟食｜曾智华
更新时间：06:00 2026-08-18 HKT
发布时间：06:00 2026-08-18 HKT
发布时间：06:00 2026-08-18 HKT
字体大小
每年此时皆如是，总有最少几十老友追住小弟问：「碌Sir，（一）你会否申请银债！（二）会申请几多？（三）今年值唔值得申请？（四）中电（002）等股票都有4厘利息，又有机会升值，会否比申请银债更好？（五）应用几钱申请，估计可以派到几多手？
都几好笑，银债已推出多年，点解班老友仍然年年问，而问的，又是同一批问题？
肯定不单止小弟老友们如此，广大读者相信也有超过六、七成会年年继续问。咁好啦，我就一年一度，徇众要求再答啦。
绝少零风险又必赚的投资
（一）银债乃政府变相派钱俾老友记，投资铁律，凡有赚冇蚀的，无论赚多少，都要去马！世上绝少零风险又必赚的投资，银债正是，「有食唔食、罪大恶极」呀！
（二）银债既是政府派钱，故必定不能批出太多，今次去尽550亿。香港60岁以上人口年年增加，即年年合资格申请者也增加，如此，每人分派到的会一年比一年减少，除非政府加大发行额。今次保底息4.25厘，远比存定期高，又冇风险，兼且保底后可能有机会向上调，故此，应将闲钱去尽！
（三）银债年年都应申请，因与存定期比较，除利率更高外，随时唔玩又冇损失，卖回俾政府已可。
（四）对，不少股票看似利息4厘或更高，但勿忘记，买卖股票要俾佣金印花外，最重要是股票存在贬值风险，你除非「新嚟」，应知不少股票可以唔声唔声跌一半。银债绝冇这点担心，买后可以内心安宁日日甜睡。
（五）应购几多手最好？虽云每人上限认购100万，但肯定蹝气，因银债分配，按认购人数多寡作决定。认购者越多，分配越少，数字公开，故绝不应傻吓傻吓掟100万落去。申请几多最精明？唔使急，等到9月头才决定。
银债9月4日下午截飞，大家可以9月3日下午睇睇几多人入咗几多手申请（中介金融机构会公开），再计计有机会中几多手，然后落飞。我每年都准备30万出击，今次不例外，望中25至30手啦！
资深传媒人 曾智华
最Hit
