【#慢读乐趣】认识广东话错别字「扬州炒饭」、「星州炒米」咪写错

更新时间：18:26 2021-12-06 HKT
发布时间：03:00 2021-05-18 HKT

　　《趣看生活：广东话常见错别字》由广东话资料馆策划出版，这是其「通学」系列第六本，旨在同读者发掘更多有关香港嘅生活用语。这是一本实用字典，最啱粤港澳大湾区使用，大家同声同气，不过，讲广东话可以天下无敌，要你写就会有读写障碍。
　　根据出版人的介绍，一出手就知本书作者系高人，现在同大家分享几个挑战，以下看你弄得通几多个问题。
　　「畀、俾、比」三个字有咩分别？
　　「𠮶、个、果」究竟要用边个？
　　「唔使」、「唔驶」定「唔洗」？
　　「办、辫、辨、辩、瓣」不分？
　　炒饭究竟系「扬州炒饭」还是「杨州炒饭」？
　　「执书/执输」、「撕纸/狮子」读音一样，但意思大不同……
　　玩完认字游戏，再考大家常识，你知唔知乜嘢系「错别字」？答案：「系错字同别字嘅统称，喺文字发明之后就已经存在，并唔系最近嘅事。所谓错字，即系写错字，通常都系涉及多写或者少写咗啲笔画；而别字又称为白字，字就冇写错到，但系就用错咗另外一个字。就以中文字而言，指喺文字嘅笔画、字体或者文法上，形音相似出现讹误，而构成一啲唔合现时『白话文』书写规范嘅字都称为错别字。但系由于文字嘅发展，好多原本嘅错字都被扶为正字，而正字反被当成错字，所以喺现时错别字嘅判断，通常就以政府公布嘅文字为基准。」
　　哗！真系唔讲唔知，我更加系第一次见识到有人用广东话文字教我语文常识。
　　再考你，大家好兴讲「督背脊」，如果你咁写，原来系错别字！督：「从日叔声，本义系日中时分，引申为中央、监察。例如︰监督、都督、基督；循名督实、平原督邮等。」如你讲「阿妈督你做功课」，OK，但「督背脊」有乜好督？除非你系脊医，佢同你睇病，监察一下你背脊，或者可以讲得通。
　　如果你用「笃背脊」，咪以为啱，虽则好多人会咁写，其实都系错别字。笃：「用于笃信、笃定、笃行等词汇。例如笃志好学、力学笃行、朴讷诚笃、笃定爱古。」之所以你用「笃背脊」就真系无厘头。应该用边个先系正字？卖个关子，等阵再同大家开估。依家要食晏，今日我买咗盒「杨州炒饭」！
　　原来我又搞错。「扬州炒饭」先至正确，相信九成人都好似我咁乌龙，原来「扬州，喺以前好多时会被人写成杨州或者阳州。」扬州喺边？我同大家百度下︰「扬州，江苏省地级市，长江三角洲中心区二十七城之一，是世界遗产城市、世界美食之都、世界运河之都、东亚文化之都、首批国家历史文化名城和具有传统特色的风景旅游城市，有『中国运河第一城』的美誉。」扬州美食好出名，不过扬州根本无扬州炒饭，此饭系广东特产。「基本上都有以下呢几款材料嘅，包括叉烧粒、鸡蛋、虾仁、时菜、葱、油、盐等加白饭猛火炒埋一碟。」
　　顺便讲埋，「星洲炒米」亦系错别字，正写系「星州炒米」先至啱，因为「星州」即系「新加坡」，Sorry，新加坡又系无出产呢款「星州炒米」，应该系香港出品，我哋落咖喱炒米粉，原意系加添南洋风味，所以老作出一款「星州炒米」，我就麻麻哋钟意，因为唔系好食得辣。
　　好啦，讲古时间过得快，又系时间讲Bye Bye，收笔之前同大家讲番之前嘅错别字。如果你话有人喺老板面前讲你坏话、打你小报告，正字系「㧻背脊」，「㧻」系动词，「指刺、戳。例如㧻眼㧻鼻。」所以话，千万不要「㧻」错背脊呀！
　　其实广东字好多系古字，不过，今时今日，大家无谓考究咁多，但系身为大湾区人，都好应该了解一次本土文化。吓，你话香港即系大湾区，你好似「政治唔正确」咁噃？有乜问题，香港唔系粤港澳大湾区，唔通香港系日本呀？香港搬唔走，你咪癫啦。我就话学写广东话，最紧要系「正字正确」，唔系咩呀！
　　大家想知多啲广东字，买本书睇啦。我要食埋盒扬州炒饭，系咁先。
　　