【#拉面控必食】食完无罪恶感！识食当然食口感浓厚、味道却不失清淡的鸡白汤汤底

更新时间：12:00 2020-06-10 HKT
发布时间：12:00 2020-06-10 HKT

对于女士而言，拉面淀粉质含量高、汤底浓、叉烧又肥，食一碗，分分钟要做返成个星期运动先减得返，所以不少拉面控因为呢份罪恶感，令拉面本身就有唔少人会却步！不过，只要识食，拉面控都可以照食可也～因为拉面其实都有分唔同汤底，钟意重口味可以拣猪骨汤、味噌汤或者鱼介汤，口味清淡可以选择鸡汤、盐汤同酱油汤。想食完无罪恶感，就一定系拣下面呢款鸡白汤喇！

鸡白汤拉面一向畀人嘅印象系较为清淡，相比起其他汤底，鸡汤就非常符合想食浓汤拉面但又怕肥腻有罪恶感嘅人。身为拉面控嘅小编，食过唔少香港拉面店，一讲起鸡汤拉面就会第一时间联想起湾仔嘅鸟华亭！

以而家香港拉面店嘅竞争环境，一间普通拉面店如果无自家特色，就只会沦为街边劣食，即使比多几蚊都唔值。鸟华亭主打鸡白汤拉面，但笔者从来未食过一间鸡白汤拉面嘅鸡汤系可以咁「胶」，饮落好似将几只鸡嘅胶质浓缩喺一碗汤入面，感觉就好似将潮州肉冻溶解成汤汁再煮稠，那份满足口感好似系口入面爆炸出来。

相比起其他拉面店，鸟华亭有一种日本空手道武术家嘅感觉，最普通最直接嘅直拳、踢脚，无需任何花巧动作，但简单一个动作已经足以击倒对手，无需要喺叉烧或者配料上花多余气力。虽然鸡白汤属于较为清淡嘅汤底，但佢将鸡白汤煮得比猪骨、鱼介汤底加倍浓厚嘅口感，而最最重要系浓厚之余又不失鸡汤原本嘅清淡，喺汤底面前，其他配料都不太值得一提。

因为好简单一个道理，无论叉烧煮得有几淋，烧得有几香，一碗拉面最重要嘅，永远就只有一样嘢，就系汤底。一碗拉面好唔好食，有无味道，都系因为汤底。

人类有无灵魂，大哲学家苏格拉底或者柏拉图都唔能够解答，但如果问拉面有无灵魂，好肯定呢碗拉面嘅灵魂就系佢个鸡白汤汤底度。

Text：Jack

Photo source: 鸟华亭Facebook