邓兆尊再提供集邮女星线索：唔系佘诗曼伍咏薇自爆畀花旦入过房亲睹富豪送妻招呼朋友

更新时间：09:00 2026-10-23 HKT
发布时间：09:00 2026-10-23 HKT

邓兆尊日前在网上节目《男人万岁》上，大爆娱乐圈内有一位极高段位的「顶级集邮女星」，他形容该女星猎男无数、战绩彪炳并直言：「基本上由一线、二线到三四线男星，佢全部都集齐晒」。虽然他为了保护当事人而坚拒透露其真实姓名，但他仍在节目中松口泄露了多个关键线索，除了外形出众「有身材有样」外，更坦承两人曾有过合作，但从未传过绯闻，邓兆尊亦证实对方目前已五十多岁，随即引发全网疯狂猜测。

邓兆尊否认集邮女星是佘诗曼、伍咏薇

有网民翻查邓兆尊由出道至今曾演出的剧集名单，希望找出「顶级集邮女星」的真身。有网民直指「江欣燕同佢本身都好熟，而且仲要有样有身材，兼且依家未够60」，佘诗曼、伍咏薇、陈炜、李丽珍以及关之琳等人亦无辜「躺着也中枪」，被列入猜测名单之中。昨日（22日）邓兆尊在YouTube节目《3宝Channel》续谈事件，对于网民的猜测，邓兆尊说：「唔会系呢度写出嚟𠮶啲，唔系喇。」邓兆尊更再度爆料，声称曾亲眼目睹名人富豪「送老婆畀朋友招呼」。

陈炜否认是集邮女星

被列嫌疑人之一的陈炜已经率先为事件回应，她直言对事件完全不清楚：「我本身唔认识邓兆尊，冇任何嘅联系，可能只系喺某啲活动见过几次咁样啰，我自己都唔会太关心呢件事，冇任何Comment，兴趣不大。」在节目上，邓兆尊亦为被网民列为嫌疑的女星洗白：「我都唔识关之琳，阿佘（佘诗曼）系男仔，系兄弟，佢自己私底下同边个拍拖我唔理，我唔清楚，我唔会过问。伍姑娘（伍咏薇）只系讲嘢大癫大肺，佢系一个细路女，真人好怕丑㗎，我同伍姑娘冇合作过，只不过系 friend，但系佢讲嘢好似好大癫大肺，好似咩都冇所谓嘅人，实际上你行埋佢哄吓佢，佢都畀你吓死。你记住啦，通常做得出嘅人，唔会成日摆喺把口讲，我同陈炜完全唔识。」邓兆尊笑言：「其实好小事，我唔会再讲，一讲就穿喇。你想知嘅睇返吴君如讲过啲嘢，好多佢都讲过出嚟，我讲啲所有嘢，好多喺圈内已经唔系秘密嘅秘密嚟㗎喇。」

邓兆尊澄清不关叶璇事

有不少网民留言问有否拍过《寻秦记》？邓兆尊说：「《寻秦记》呢个圈子有几乱，我真系唔识讲，呢啲嘢自己谂啦，每一套剧都每一套剧乱嘅圈子，呢样嘢我冇参与过，我唔知，OK？」亦有问是否叶璇？邓兆尊说：「呢个好厉害，不过就唔关佢事，佢系华裔小姐，𠮶年我系做表演嘉宾，去过好远唔知大陆边度拍外景。佢入过我房，不过系返嚟倾偈，但系好奇怪，𠮶啲每一个华姐返到房之后呢，轮流走入我房度倾几分钟偈，跟住就走，有呢样嘢。佢问我一个问题，就话：『我有冇机会赢冠军？』我话：『你唔使问啦，你应该系冠军啦。』呢个好乱，不过就唔关佢事。」

邓兆尊大爆娱乐圈潜规则

邓兆尊称大家都明白游戏规则：「短聚咪短聚，完咗嘅话咪散band啰。或者大家识三个月，三个月后完咗咪冇乜事啰。早排有个节目，伍姑娘（伍咏薇）讲过试过有个人走去敲房门，敲个女演员房门，突然间有个导演后面闪咗出嚟，呢样嘢都有存在，唔出奇。即系你要明白样嘢，点解我需要去痴一个人，或者同一个人发生关系呢？不外乎两个原因，一系我就睇中你嘅美貌，或者你嘅靓仔，其次就系利益啦，唔使讲啦，我畀你𡁻咗、或者你𡁻咗我嘅话，有利益嘅帮助嘅时候，我咪做呢个动作啰。好简单㗎嘛，不外乎呢两样嘢嘛。」

邓兆尊亲睹富豪「送老婆畀朋友」

主持问到这些「利益输送」会否涉及高层？邓兆尊说：「经过权力嘅嘢去达到目的，系有嘅。而家都有。好多嘢自己谂喇，我都成日讲，有啲嘢呃唔到人嘅，尤其系你系普通人，突然间富贵咗好多嘅时候，明唔明呀？即系譬如我系一个新闻报导员，返工放工好正常，突然之间你返工，转揸 Hermès，周身名牌嘅话，点解会咁样呢？你自己谂吓点解啰。你记住一样嘢，好多呢个世界你谂唔到嘅嘢，你唔发生，唔代表唔会喺人哋身上发生，你记住一样嘢。人哋付出几多，或者佢底线降得几低嘅话，佢得到几多回报，系佢自己应得嘅。你唔可以话：『喂，大家都做呢行，点解佢会弹得咁快，我弹得咁慢？』一系你就有才华，我成日都讲句说话：有才华或者有能力嘅人大把，但系所谓嘅怀才不遇。其实就唔系怀才不遇，其实系你唔识得点去利用另一个渠道，去畀人睇到你嘅才华，或者俾机会你去实现入你嘅才华，咁解。我成日都讲红颜薄幸，点解一个靓女成日都会话佢唔好呢，或者将来𠮶个生活或者个婚姻唔好呢？大佬，你咁靓女，系人见到你，呢个蛋糕好食，都想食一啖啦，系咪？咁你食多几啖嘅时候，就出事㗎喇嘛，明唔明呀？」

邓兆尊言谈间再投下「炸弹」：「我都成日讲啦，你有冇见过啲有钱人，特登攞个太太出嚟，畀啲朋友招呼㗎？我见过，我知道。佢仲要坐喺度食雪茄，问得唔得？掂唔掂呀？你记住一样嘢，好多呢个世界你谂唔到嘅嘢，你唔发生，唔代表唔会喺人哋身上发生。」邓兆尊当然未有透露身份：「佢哋名人，招呼𠮶个都系有头有脸。」