陈家乐新歌发布会紧张到流鼻水 连诗雅感动冲上台揽实
发布时间：01:19 2026-09-25 HKT
陈家乐日前举行首支个人单曲《我们都是无名氏》新歌发布会，首度公开演唱新歌兼首播MV。不少圈中好友包括洪卓立（Ken）、许靖韵（Angela）、杨天宇（Angus）、周志文、张文杰等都前来撑场。虽然当晚家乐紧张到流鼻水，要问台下观众拿纸巾抹！不过全晚最sweet，一定系太太连诗雅（Shiga）全程心心眼撑场，最后更感动落泪。
陈家乐高唱《拒绝再玩》
发布会上，家乐唱了郑伊健《心照》、张国荣《拒绝再玩》、新歌《我们都是无名氏》、陈奕迅《孤独探戈》及连诗雅《只要和你在一起》。家乐一上台就话：「真系好惊呀！估唔到紧张过行任何一个红地毡，好紧张！」担任MC的李靖筠（Gladys）问到大家知不知道家乐是新秀入行，台下的陈太Shiga即刻大叫：「我知！」十分搞笑。家乐笑说：「洪卓立都系我之后㗎咋！」全场随即大笑。随后拿起电结他边弹边唱出《心照》及《拒绝再玩》。
李靖筠误将「平台」说成「平房」
新歌将于10月5日推出，Gladys落力宣传，本想叫大家到时可于各大平台收听，不过她误将「平台」说成「平房」，家乐即搞笑接上，「平房，系呀，或者药房都可以听到嘅。」弄得全场大笑，同时亦为家乐缓和紧张心情。到最后一首歌时，Gladys表示这是最sweet的环节，家乐先笑说原本只唱四首，「因为我都顶唔到太多啦。」
陈家乐要「覆桌」唱《只要和你在一起》
不过难得有这个机会，除了要「表示」一下，而且更要「覆桌」，「唔做又对唔住某个人，最紧要就系多谢我老婆啦！其实呢首歌系喺我哋婚礼嘅时候唱俾佢听，但𠮶阵时仲衰过淆底，喊埋出嚟，完全唱唔到，炒得好紧要。好多人将我最丑、唱到炒晒𠮶段就摆上网。而家难得有个机会，就想覆桌！唱返好少少，等人哋将来可以post返上去。但呢首歌真系好难唱。」之后家乐唱出Shiga的《只要和你在一起》，Shiga在台下边开着电话灯边唱又边喊，家乐唱到中后段便伸出手叫Shiga上台，Shiga一上台即揽着家乐，又一齐合唱，Sweet到爆。最后家乐鞠躬感谢大家前来的时候，不小心揈甩眼镜落地，虽然虾碌，但都无损全晚温馨又搞笑的气氛。
陈家乐直言人生最紧张似窒息
完Show后，家乐直言今次是人生最紧张的一次，「Show前𠮶种感觉好似全身冇力，作病咁样，个脑入面系咁谂住啲歌词、谂住啲Chord，完全唔系一个深层嘅睡眠。今朝十点已经系处于一个好迷嘅状态，个脑净系不断咁重复啲歌词，好紧张，即使陈太系咁讲说话令我放松，但我完全入唔到耳！」他指自己刚到场时更是手脚冰冷，「好似就嚟累低，个感觉系呼吸唔到、就嚟窒息。」上台后虽然仍然紧张，但感觉变得神奇，「弹第一Chord嘅时候，就有种：『死就死啦！』嘅感觉。我都唔知自己个演出会点，都上到嚟，The Show Must Go On！」他指有位同事跟他说「Action」后便觉得「我就系要做好呢场戏」，「越唱到后面就越轻松，今次比自己五十分啦，啱啱好合格。」
陈家乐多谢连诗雅洪卓立
家乐又特别多谢太太Shiga跟Ken，「Show前陈太都有不断帮我纾压，令到我冇咁紧张，讲咗佢好多舞台嘅经验，希望我可以上台前有啲咩准备。」Shiga全程喺台下默默支持，的确是家乐最大的定心丸；至于阿Ken，家乐谓：「阿Ken好帮忙，前日佢专登去咗我彩排嘅地方，俾好多Tips我，我边啲位或者发声位要再俾啲力，因为可能以前唱歌嘅习惯未系好改到，佢即时就话到俾我听咁样唔系咁好，帮我调整。」提到乐坛颁奖礼，家乐即耍手拧头，「呢个太遥远啦，我唔敢去谂。我反而更加希望系呢首歌有观众或者一啲认识我嘅朋友听到，可以更加了解到陈家乐想表达啲乜嘢，重点系多啲人去认识我同埋呢首歌。」
