陈建兴侍候「扭计」黄夏蕙考功力 51岁攻乐坛做新人求夹缝生存丨独家
发布时间：08:00 2025-08-22 HKT
51岁「乐坛处男」陈建兴（Philip）破格推出首支单曲《一分钟》，以歌寄意呼吁「爱要及时」。这位中年转战幕前的新人，在94岁师姐黄夏蕙（夏蕙BB）的带领下闯荡娱乐圈，传授了最地道的江湖生存智慧，提示要有江湖义气。不过，BB「反老顽童」的疯狂行为，Philip坦言都多次被激嬲过！ 采访：方骞平 摄影：罗安强 场地：ASOK THAI GARDEN@亚士厘道
陈建兴处男出新歌《一分钟》，喻意要珍惜，冇及时表白的话就会有遗憾。他表示，时下好多人唔开心，引申到大家可以静下来谂多一步，就会少咗做傻事。虽然《中年好声音》被指拢断市场，但Philip仍然相信可以喺夹缝中生存，间中好似烟花咁爆一爆：「自己系素人要不断努力学习，期望能继续生存，好似姜涛咁用作品说话。」
Philip 3年多前由文职转做艺人，加入娱乐圈全因为天时、地利、人和：「𠮶次去朋友gathering认识黄夏蕙经理人Simon，佢追问我『有冇兴趣做下幕前？』哈！最初我仲以为系街头骗案。咁啱市道唔好，𠵱家冇做份正职（文职），艺人就当成副业。」问到做艺人要否带钱打工？他庆幸说：「暂时唔使，哈！Simon话睇下市场反应。」
曾被眼望望质疑系乜水
自签下Simon旗下的网台GOOD SHOWTV后，Philip率先先主持节目《飞越平淡》，探访不同的罕见病患者：「从中启发到我哋行得食得走得已好好。」谈到作为素人，在圈中可有遇过难堪事？他却说没有，但都感受过被眼望望：「啲人好似喺度问『你系边位呀？』幸而因为贴身照顾住黄夏蕙，唔会有人松踭嘅！」然而夏蕙BB经常扭计及失控行为令他无可奈何：「佢太烂玩，就算有嘢做都懒死唔走，要边哄边拉佢走；佢间中又会『跳掣』，反老顽童乱噏嘢，试过唔理我提示，拨开我只手喝话『你知乜呀！』」不过，夏蕙BB有传授宝贵的人生智慧及锦囊：「佢话唔好怕蚀底，要有义气。」
