姚焯菲望演技提升拍《爱·回家》识玩爆肚 蛇年钟柔美努力学写歌 詹天文试独居生活丨独家
发布时间：07:00 2025-02-07 HKT
姚焯菲（Chantel）、钟柔美（Yumi）和詹天文（Windy）龙年过得好充实，除工作外，还要努力考好成绩入大学。展望蛇年，她们都想工作和生活上有新尝试，在广州升读大学的 Windy，会尝试过独居生活；Yumi 除会多唱慢歌，还会努力尝试作曲和填词；未入读大学的 Chantel会全情投入演艺工作，刚加入《爱·回家之开心速递》希望尽快提升演技，拍摄时可大玩爆肚。采访：杜杜 摄影：朱伟彦 发型:Hugo Poon@PRIVATE i salon化妆:King yip@kingsmakeup
Windy坦承龙年为考公开试放慢了工作脚步，所以未算过得太满意，「鱼与熊掌不可兼得，喺学业达到好满意嘅成绩，入到想入嘅大学，但事业方面做嘅嘢未够多，净系出咗1首派台单曲同剧集歌。」但去年愿望，踏入18岁植发却顺利完成，「DSE完咗第2日就去做咗，系咪睇唔出？！发际线天生高都困扰咗好耐，1年恢复期到今年5月就完成，到时可以再染同整其他发型嘞！」她直言现在自信返晒嚟，「以前吹风成日要揿住啲头发，𠵱家可以吹啦！哈哈！」
Windy望操到马甲线
新1年愿望，Windy想苦练马甲线，令着衫更多选择，「𠵱家只系喺瑜珈垫做简单训练，想去健身做啲机器式锻炼。」她又想勤练乐器，向唱作歌手路迈进，「希望不久将来曲词编监都参与到，大学拣咗啲关于编曲嘅堂，希望音乐嘅范畴有深啲造诣。」她透露将出新歌尝试凶灵风格，「希望自己喺唱歌方面有多啲进步同突破。」《青春本我》后，她未有拍剧机会，都想多尝试，「都知好辛苦，但如果出嚟效果观众钟意，会好有满足感，想演啲双重人格或者反差大嘅角色。」已入读广州星海音乐学院流行音乐系的她，有望在广州过独居生活，「本身系住6人宿舍，但大家生活习惯有啲唔同，下学期会搬去附近一个人住。」
Yumi演高海宁年青版
龙年推出了3首歌，Yumi都觉得好满意，「2首快歌外，仲出咗首剧集嘅歌《Come with me》，全英文系新尝试，见大家反应都唔错，好proud of《企业强人》仲攞咗最佳剧集。」她认为学业方面仍有进步空间，「未入到理想嘅大学，会喺未来时间爬返上嚟。」而她最开心已正式报名考车牌，「生日后冇耐即刻去报咗，未拎到真正嘅身份证，攞住张纸就去报。」她好羡慕Chantel感受过自驾游的乐趣，期待正式学车，「我见Chantel post出嚟，好想坐佢架车呀！」
Yumi希望蛇年能做多些新尝试，「我畀大家印象系跳唱歌手，唔想大家闷，想试吓唱啲抒情歌，虽然唔系我嘅强项。」她亦会努力尝试创作，上年已踏出了第1步，「1个人喺间房度对住个琴，咩都唱吓，冇乜框框咁掉晒所有嘢出嚟，好开心行到呢步开始作曲填词，最难就系第1步，𠵱家仲慢慢摸索紧。」演戏方面，她继《特勤女团》后再完成《夫妻的博弈》，更有幸演高海宁年青版，「好开心导演揾我，觉得我同高Ling有啲相似，希望可以继续尝试。」跳舞风格，她亦会有所转变，「之前跳舞比较韩式，都想试吓跳比较欧美风，可能比较成熟啲，𠵱家不断学习紧。」
Chantel将首演音乐剧
Chantel好满意龙年发展，因达成不少愿望，兼顾学业下仍有不少作品，「上年真系读书为先，希望冇跌好多人气或者乐坛成绩。」对于以「Academic High Distinction」荣誉在奥克兰拔萃女子学校毕业，她感到很荣幸，「颁奖系个肯定，都努力咗好耐，有个学业嘅奖都好欣慰。」凭《爱·回家》主题曲《这个家》夺得「最受欢迎电视歌曲奖」，她亦好感恩，「真系唔容易攞到《万千星辉》嘅奖，我见好多大前辈攞呢个颁奖典礼嘅奖，自己攞好唔真实，要多谢大家欣赏同喜欢呢首歌。」
踏入蛇年，Chantel已有好开始，参与处境剧《爱·回家》演熊家表妹「高一彤」，正努力适应，「演戏唔系我最拿手嘅嘢，需要再磨练，学习身边嘅演员点做，处境剧同其他长剧唔一样，前辈都有提点我。」她拍此剧更有目标想做到，「好期待熟练后可以爆肚，佢哋爆得好幽默，唔会太过over切合个角色，自己都想试吓。」今年她还会首次演出音乐剧，「到时再同大家讲细节，要唱歌又要演都好期待，而嚟紧出新歌系大突破，大家要留意。」
